Туныктышо жап дене тӧр ошкылшаш

Нефтекамск олаште профессионал мастарлык конкурсыш тений 38 туныктышо да воспитатель ушнен. «Педагогический дебютышто» школлаште да йочасадлаште тыршыше самырык специалист-влак усталыкыштым ончыктат гын, вес тӱшкаште туныктымо пашаште ятыр ий тыршыше туныктышо-влак таҥасат. Эн уста, эн виян туныктышын лӱмжым сеҥен налме верч оласе туныктышо-влак куштылго огыл да йыжыҥан корным эртеныт. Эн ондак нуно «Мый туныктышо улам» эссем возеныт, Интернет-сайтым ямдыленыт, методика семинарыште ойырен налме темылан актуальный проблемым лончыленыт, палыдыме классыште виш урокым ончыктеныт.

24 январьыште туныктышо-влакын интеллектуал таҥасымыштым шке шинча дене ужаш пиал логале. Кок кече жапыште нуно Башкир гимназийыште шке предметышт дене мастер-классым ончыктышт. Математикым туныктышо А. Сафаров (2-шо школ), физкультурым туныктышо Д. Маникаев (икымше лицей), историйым туныктышо-влак Д. Яшкин (3-шо школ) ден А. Пономарев (Башкир гимназий), музыкым туныктышо И. Стерхова (11-ше школ), руш йылмым туныктышо О. Солнцева (13-шо школ), тӱҥалтыш класслаште туныктышо-влак И. Назарова (7-ше школ) ден Н. Гулюк (9-ше школ) сценыште 20 минуташ мастер-классым ончыктышт. Кажне выступлений оҥай методика, у технологийым кучылтмо дене шке семынже ойыртемалтше ыле. Тиде математика урокышто робототехника йӧным кучылтмаш, спортын чылалан эрыкан улмыжым почын ончыктымаш да молат. «Идалыкын туныктышыжо - 2019» конкурсышто сеҥышым увертарыме марте жап шуко кодын огыл - туныктышо-влак мастарлыкыштым эше педсоветыште ончыктышаш улыт.

«Тыгай серьезный конкурсыш икымше гана ушнышым. Мом тугайым ойыртемалтшым ямдылаш, могай келшыше да эффективный йӧным кучылташ - тыгай йодыш-влак йӱдшӧ-кечыже уш-акылым тургыжландареныт. Кагаз коклаште да компьютер ончылно шинчылтын, малыдыме йӱд-влак нерген ойлыманат огыл. Психологий настройлан кугу тӱткышым ойыренам. Чылажат сай лиеш, чыла нелылыкым сай кӱкшытыштӧ эртен сеҥем манын, шкем ӱшандаренам. Вузым пуйто шукерте огыл тунем лектым, а таче шымше ий историйым туныктем. Мый, туныктышо лиям манын, нигунам шонен омыл. Вузым тунем лекме деч вара школышто ышташ тӱҥалмеке, йоча-влак деке моткоч шӱмаҥынам. Мылам нунылан у шинчымаш тӱням почаш моткоч келша. Конкурсышто усталыкемым шуарымаш мылам чумырымо опытемым кугурак аудиторийлан кумдан почын ончыкташ йӧным ыштыш».

«Кеч-могай профессионал мастарлык конкурс у шинчымашым ешара. Тачысе таҥасымашат уым пален налаш, кызытсе илыш дене тӧр ошкылаш тарата. Мемнан пашаште тидым кузе умылыман? Урокышто, класс деч ӧрдыжсӧ сомылышто кызытсе илышлан келшен толшо у информаций технологий-влакым чын да моштен, кумданрак кучылтмаш шотышто шуаралташ йӧным пуа. Пашаштына тачысе кечын йоча, ава-ача-влак дене вашкылым ыштыме годым социальный сетьым кучылтмаш да молат - чыла тидым конкурсын «шоктеже» гоч эртен, шке ужын-колын веле палаш, умылаш лиеш. Да, конешне, педагогика опытым икте-весе дене вашталтымашын пайдаже моткоч кӱлешан».