Таче студент лияш куштылго мо?

«XXI курымын студентше - тиде самырык, «чыла курыкым савырен кертшашлык» айдеме. Тудын ончылно чыла омса почылтеш - кумылжо гына лийже. Кызыт студент-влак талантан, куштылгын тунемше, улан улыт, йырысе илышлан писын йӧнештаралтыт. Цельым шындат гын, шукташак тыршат. Тачысе студентын тӱҥ атрибутикыже - кызытсе информаций технологий (телефон, ноутбук, моло гаджет). Студент гаджет деч посна иленат ок керт. Студент радамыш ушнымек, ик йодыш тургыжландара: дипломым налмек, кушто чонлан келшыше пашам муаш? Шуко вере сокращенийым ыштат, южыжо пашадар дене ондала (огеш тӱлӧ але паша гыч луктын колта), престижный паша верыш «теҥгечысе» студентым огытат нал. Чыла вере стажым йодыт, йошкар дипломат огеш полшо. Сай пашаш палыме гоч гына пураш лиеш. Пенсий реформат студентлан чаракым ышта: ийготым кугемдымылан кӧра пенсийыш шушо-влак умбакыже пашам ышташ тыршат. Полшышаш «межан кидан» еҥет уке гын, кузе лийман? Изи олаште пашам муаш эше йӧсырак. Кугу олаш каяш гын, тушто илыме вер да кугурак пашадар кӱлеш - уке гын, илашат ок сите. Диплом марте жап шагал кодеш, а вуйышто тыгай йодыш-влак шукемыт гына. Пайрем вашеш студент йолташем-влаклан жапым пайдалын эртараш, сессийым сайын сдатлаш, у йолташым муаш, шонымашыш шуаш тыланем, тӱҥжӧ - илышыште мо кӱлешым палаш.

«21 курымын студентше - тиде «цифровой» студент. Тудо кызыт телефон да компьютер дене гына пайдалана, ручка да кагаз дене коштшо студентым кечывалым тул денат кычал от му. Студентым библиотекыштат муаш йӧсӧ, а клубыште - кеч-кунам! (Шаярем). Студент-влак книгам огыт луд манын ида шоно. Ида ойгыро, книгам кугурак-влак да илалше тукым лудеш.

Самырык-влак чылан телефонышто шинчат - блогер-влакым лудыт, социальный сетьыште «кечат».

Но тидын годымак тачысе студентым «ожнысо» гаяк йодыш-влак тургыжландарат. Тиде стипендий, паша вер.

Йолташ-влак, студент илыш - эн сай жап! Тудым пайдалын да оҥайын эртарыза, тек вара шуко сай тат шарнаш кодшо! Мыйын йӧратыме шомакем уло: «Пӧртыштӧ ида шинче!» Компьютерым - ӧрдыжкӧ, лекса уремыш! Эше, рушла каласаш гын, везенийым тыланем! Тудо уке гын, экзаменыште кеч кусарен налаш йӧн эре лийже!».

«Йоча-влак дене кылым кучаш тӱҥалам. XXI курымын студентше, мыйын шонымаште, шке семынже интеллигент улеш. Шуко лудшо, ушан, нравственность манме шотыштат ончылно. Кызыт шонымашым илышыш шыҥдараш йӧн шуко уло. Мыят тунемам да эше искусствышто вием тергем. Почеламутым, сценарийым возем, гитар дене шоктем, фехтований дене заниматлем, яра жапыште тӱрлӧ курсыш коштам. Ончыкылык илыш дене кылдалтше йодыш тургыжландара. Эн ондак - тиде кушто паша верым муаш? Ешым чоҥымо йодышат лектеш. Тӱҥжӧ - илышыште шке верым муын мошташ. Садлан студент-влаклан лӱддымылыкым, чытышым тыланем. Илышнам ме шке чоҥена. Эше чын йӧратымашым, кудым чылан кычалыт, да пеҥгыде тазалыкым тыланем».