Сай шинчымаш дене куандарышт

Олимпиадыш марий йылме дене Мишкан, Пӱрӧ, Калтаса, Белебей, Илиш, Бакале, Караидель, Янаул, Краснокам, Балтач, Дӧртыльӧ районла гыч шочмо йылмым йӧратыше, келге шинчымашан витле утла йоча погыныш.

Икымше кечын тунемше-влак викториным ыштышт, а кум шагат гыч куд шагат кас марте пуымо теме почеш сочиненийым возышт. Кокымшо кечын темлыме теме почеш мужыр дене ваш мутланымашым чоҥышт. Тыште йочан яндар марий йылме дене кутырымыжым, шонымыжым чаткан да раш каласен моштымыжым, кумда тӱня умылымашыжым акленыт.

Мишкан район гыч лу тунемше шке шинчымашыжым терген. Нунын кокла гыч Жанна Акушева (Пӱнчер школын 8 классыште тунемшыже, туныктышо - И.В. Айгузина), Анита Тимиркаева (Чорай селасе Я. Ялкайн лӱмеш гимназийын 9 классыште тунемшыже, туныктышо - А.Б. Чаплыгина), Галина Губеева (Чорай селасе

Я. Ялкайн лӱмеш гимназийын 10 классыште тунемшыже, туныктышо - О.В. Иркабаева), Снежанна Апкадирова (Ардаш школын 11 классыште тунемшыже, туныктышо - Н.Д. Байдимирова) сеҥышыш лектыныт. А Алиса Миксонова (Чорай селасе Я.Ялкайн лӱмеш гимназийын 8 классыште тунемшыже, туныктышо - А.Б. Чаплыгина), Аделина Аптыкаева (Ардаш школын 9 классыште тунемшыже, туныктышо Н.Д. Байдимирова), Анастасия Павлова (Монар школын 9 классыште тунемшыже, туныктышо - А.С. Ибаева), Анастасия Николаева (Тынбай школын 10 классыште тунемшыже, туныктышо - Н.П. Минаева), Регина Васингина (Монар школын 10 классыште тунемшыже, туныктышо А.С. Ибаева), Наталья Алексеева (Чорай селасе Я.Ялкайн лӱмеш гимназийын 10 классыште тунемшыже, туныктышо - О.В. Иркабаева) призер лийыныт.

Тиде сеҥымаш дене тунемше дене пырля туныктышо-влакымат саламлена. Тыгак республикысе олимпиадыш каяш йӧным ыштымыштлан образований район пӧлкам вуйлатыше С.А. Александровлан, методист А.С. Килинбаевалан таум каласена.