Шыжын кӧстенечше куандарыш

«Мотор шыжым ужатен колтена ме, муралтен!» - тыгай почеламут корныла-влак шергылтыч изи йоча-влакын шыже пайремыштышт. Шыже - идалыкын пеш мотор жапше. Чевер лышташ, пеледыш, пакчасаска да емыж - чылажат чоным куандарыш. Йоча-влак куаныштым сӱрет, почеламут да муро сем гоч почын ончыктышт.

Ача-ава полшымо дене нуно пакчасаска гыч тӱрлӧ модышым ямдылышт. Чевер тӱсан лышташ, пакчасаска да емыж сӱрет-влак пырдыжым, окнам сӧрастарышт. Тыгай пӧлемыш пурымеке, чылт йомак кугыжанышыш логалмыла чучеш! Чыла тидым йоча-влак шке кидышт дене ямдыленыт. Вашкӱзӧ, карандаш, кистычке да пластилин дене пашам ыштышыла, йочан кид лывыргылыкше вияҥеш, ончыкыжым школышто тунемаш сай негыз лиеш. Кажне пакчасаскан шке пагытше уло, маныт. Изи йочаланат, кушмыжым эскерен, ийготшылан келшыше пашам пуыман. Вашкыме дене йочалан пайдам огыл, мӧҥгешла, эҥгекым ышташ лиеш.

Пайремыште шуко почеламут, муро шергылте. Изи артист-влак ончаш толшо уна-влакланат мурым пӧлеклышт, туштым туштен модыч, йомакым модын ончыктышт, рӱж кушталташ лектыч. Тыге йочан уш-акылже пӱсемеш, йылмыже лывырга, мут шондыкшо пойдаралтеш. Пырля шогалын куштымо да модмо годым икымше гана йочасадыш толшо ньога вожылмыжым сеҥа, вес йоча-влак дене вашкылым чоҥа.

Йоча-влак пайремым пеш йӧратат. Изи годсо пайрем шӱлышым нуно ӱмырышт мучко шарнен кертыт. Шарнымашышт эше волгыдырак лийже манын, пайрем мучаште йоча-влак шыже кӧстенечым - корзиҥга тич чевер, тамле олмам - нальыч.

И. ЗАХАРОВА.
Монар школ,
Мишкан район.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».