+8 °С
Пылан
Чолман в ВК
DZEN
Чолман Telegram
Чолман в ОК
Все новости
Шинчымаш кугорнышто
17 Шыжа 2018, 18:10
Марий шӱлышеш кушкыт
Нефтекамск олаште тӱрлӧ калык ила: марий, татар, башкир, чуваш, удмурт да молат. Кажныже шке йӱлаже, тӱвыраже, койыш-шоктышыжо дене ойыртемалтеш. Нунын дене икшыве-влакым изинек палдараш лиеш. Мемнан «Семицветик» 39-ше йочасадыштына марий калыкын историйжым, йӱлажым аралыме да вияҥдыме шотышто шуко паша ышталтеш. Краеведений лукым почмо. 16-шо группыш пуреда гын, вигак марий шӱлышым шижыда. Шкаф-влакым, кажне лукым марий орнамент дене сӧрастарыме. Изи ӱстембалан тӱрлыман ӱстелшовычым, койкеш тыгаяк мотор покрывалым шарыме. Тушан марий тувыран курчак-влакым сылнын вераҥдыме. Йоча-влак «Мыйын ешем» модыш дене модаш йӧратат.
А кузе нунылан, «семӱзгарым» шокталтен, муралташ-кушталташ келша! Ача-ава-влакым модыш семӱзгар-влакым: кӱслем, тӱмырым - лӱмынак ыштен пуаш йодынна ыле. Пу гыч марий ӱдырымат келыштаренна. «Кидешыже» тӱрлыман шовычым, изи ӱдыр ден рвезылан тувырым, шӱешыже шийдарманым сакалтенна. Дидактический модыш да модыш курчакна-влакат лыҥак улыт. Йоча-влаклан ончыкташ альбом, книга, папке-влакым («Марий калыкын чиемже», «Марий семӱзгар», «Марий калыкын кочкышыжо» да молат) ятыр погенна да ямдыленна. Воспитатель М.И. Вайтина логоуголокыш Логосалика курчакым ыштыш - тудо икшыве-влак дене йылмылан артикуляционный гимнастикым ыштыме годым пеш полша.
Мый йоча-влак дене «Ковайын шондыкшо» кружокым намием. Тиде кружок марий, татар, таджик, башкир икшыве-влакланат чот келша. Изи ӱдыр-рвезе-влак марла тувырым, согам да молым таваласен чияш тӧчат. Кажне кружокышто тиде шондык гыч тӱрлӧ арверым: согам, тувырым, семӱзгарым да молым - луктына.
Шукерте огыл «Эн сай йочасад» оласе конкурсышто 39-ше йочасаднам «Поликультурный образовательный средам вияҥдаш эн сай йӧным ыштымылан» номинацийыште сеҥымылан диплом дене палемдышт. Тыгай ак, мутат уке, ончыкыжат вийым пыштен тыршаш кумылаҥда.
О. КУГУБАЕВА, 39-ше йочасадын воспитательже.
Нефтекамск ола.
Читайте нас: