Тӱҥжӧ - сай качестван образований

РФ Президент В. Путинын майысе Указыштыже палемдыме семын, 2024-ше ий марте Россий сай качестван образованийым пуышо лу эн виян эл радамыш пурышаш. Дискуссий площадкылаште погынымашын участникше-влак туныктымо да воспитаний системыш эффективный у йӧным шыҥдарыме, йочалан кум ий марте шуаралташыже йӧным ыштыме, профессиональный образований системыш вашталтышым пуртымо, инклюзив (начар тазалыкан икшыве-влакым туныктымаш) образованийлан полышым пуымо нерген каҥашеныт.

Башкортостан Вуйлык Рустэм Хамитовын мутшо гыч, кундемысе школ, йочасад-влакым у тунемме ийлан ямдылашлан тений республика бюджет гыч ешартыш 1 миллиард теҥгем ойырымо. Республикылан 100 ий темме вашеш кундемыште

49 образований учрежденийым чо-ҥымо да ачалыме паша шукталтеш. Тушеч куд школым да йочасадым тений почаш палемдыме. Шушаш кок ийыште йочасадлаште лу тӱжем верым ямдылыман. 2025-ше ийлан школ-влак ик смена дене пашам ышташ куснышаш улыт. Тӱҥ педкаҥашыште Башкортостаныште технологический грамотностьым кӱкшемдыме, одаренный икшыве-влак шотышто пашам саемдыме, отрасльын материальный базыжым вияҥдыме, у образовательный технологийым илышыш шыҥдарыме, студент-влаклан стипендийым кугемдыме, кадр-влакым «таптыме», оте-чественный да йот элласе сай опытым кучылташ кӱлмӧ проблемылан тӱткышым ойырымо сомылым тӱҥ йодыш семын палемдыме.

Л. ШАВАЛИЕВА.

Снимкыште: Российын опорный вузшо - Уфасе кугыжаныш нефтяной технический университет - Робототехника рӱдержын ямдылыме экспозицийым ончыкта.

УГНТУ-н официальный сайтше гыч налме фото.