Суапле пашам шуктымо

Тудым почаш шонымаш шукертак шочын, вет район уста туныктышо-влаклан моткоч поян, кажныжын илыш корныжо, пашаже самырык тукымлан сай пример лийын кертеш. «Путник» рӱдерын моткоч чолга, шке пашаж верч чон йӱлен тыршыше директоржо В.А. Князев материал-влакым иктыш чумырен, нуным шотыш конден, ситыдымыжым пырчын-пырчын поген. Сулен налме канышыш лекше педагог И.Т. Саметова тиде пашам шуктымаште тудын ӱшанле полышкалышышкыже савырнен. Тудо туныктышо Тоймет Бикмурзинын ешыж гыч улеш.

Тоштер 2017 ий 25 августышто, туныктышо-влакын августысо конференцийышт годым, омсажым почо. Тудым почмаште педагогический пашан ветеранже да ӱжмӧ уна-влак, БР образований министерстве гыч калык образований пӧлкан тӱҥ специалист-экспертше Г. Усманова, Бирск ПМПК-м вуйлатыше С. Денисова, образований район пӧлкам вуйлатыше С. Александров лийыныт.

Тоштерыште 20 утла ужаш уло, кажныштыже шуко материалым погымо: районыштына почылтшо икымше школ, икымше туныктышо, директор, заслуженный туныктышо, Кугу Ачамланде сарыште кредалше туныктышо-влак, районысо кугу школ-влакын историйышт да молат. Пионер да октябренок движенийлан, ешартыш образований системылан посна верым ойырымо. Тоштерым ыштыше-влак этнографий темымат монден огытыл.

Мемнан районышто школым тунем пытарыше да Башкортостаныште, Марий Элыште, моло кундемлаште илыше землякна-влак нерген шуко материалым чумырымо. Калык образованийын пашажым историй летопись семын радамлен ончыктымо. Тиде тоштер самырык тукымым патриот семын, ару чонан да пашалан туныктен куштымо рӱдер лийшаш.

Ме, таче илыше ветеран-влак, ты тоштер дене моткоч кугешнена. Ветеран движенийын, калык образованийын, правам аралыше орган-влакын, краеведческий музейын, марий историй да тӱвыра рӱдерын, районысо тӱвыра полатын, библиотека, ялысе клуб-влакын пырля шуктымо пашашт самырык тукымым патриотизм шӱлышеш куштымаште суапле верым налын шогаш тӱҥалеш.

Д. ЯМЕТОВ, педагогический пашан ветеранже, РСФСР калык просвещенийын отличникше.