Пытартыш йыҥгыр кумда тӱняшке ужата

Нуным саламлаш Акпарс ялсоветын вуйлыкшо Р.Г. Ягудин, ялын депутатше Г.Е. Мухаметов, пенсионер туныктышо-влак, йоча-влакын ача-авашт, ял калык погыненыт ыле. Эр гычак йӱр йӱрмылан да игече юалгырак улмылан кӧра пайремым школ кӧргыштӧ эртарышт, туге гынат нигӧн кумылжо волен огыл.

Пайремым школ директор Г.Ф. Габ-драхманова почо. Тудо погынышо-влак дене саламлалте да выпускник-влакым «Пытартыш йыҥгыр» кече дене саламлыш, экзаменым сайын кучаш, кумда илыш-корнышто лӱдде ошкылаш, шке шонымашке шуаш тыланыш. Предметный олимпиадылаште, конкурслаште, таҥасымашлаште сеҥыше выпускник-влаклан Чап грамотым, ача-аваштлан тауштыме серышым кучыктыш.

Варажым выпускник-шамычын икымше туныктышышт М.П. Исламова, класс вуйлатышышт В.Д. Курмакаев, икымше классыште тунемше-влак ятыр поро шомакым каласышт, чоныш логалше почеламутым лудыч. Ӱдыр-рвезе-влак мурым мурышт, изи йоча-влаклан шарнен илаш книга-влакым пӧлеклышт. Вальс сем йоҥгалтмек, пайремым ямдылыше Е.Д. Курмакаева кушташ лекташ ӱжӧ. Тыгодым выпускник-влакынат, ача-ава ден туныктышо-влакынат кумылышт тодылалте. Тунемше ден туныктышо, ача ден ӱдыржӧ, ава ден эргыже зал мучко мужыр дене вальсым пӧрдыч.

Пытартыш йыҥгырым 9-ше классыште тунемше Родион Ташмурзин да 1-ше классыште тунемше Валерия Якупова шергылтарышт (снимкыште). Мучашлан выпускник-влак, шонымашышт шукталтше манын, школ кудывечыште тӱрлӧ тӱсан шарым южыш колтышт. «Чеверын, школ, чеверын, йоча жап!» маншыла, шар-влак кӱшнӧ мӱндыркӧ чоҥештен йомыч.

Г. АХМЕТШИНА.