Усталык конкурсышто вийым тергышт

Тудо поро йӱлаш савырна, манаш лиеш: районыштына кумшо ий почела вийым нале. Мероприятийыш районысо школла гыч марий йылмым йӧратыше 47 тунемше да пошкудо Караидель район гыч 3 тунемше ушненыт. Тунемше-влак шке шонымо юзо йомакым, келге шонымашан почеламутым, мыскарам, эссем уло кумылын каласкалышт.

Жюриште Марий Эл Республикысе Писатель ушемым вуйлатыше С.Д. Архипова, «Келшымаш» газетын пашаеҥже В.А. Абукаев, марий йылмым да литературым туныктышо-влакын методический ушемыштым вуйлатыше Н.Г. Салиева, краеведческий библиотекын пашаеҥже-влак О.М. Зайнетдинова да И.Х. Айбердина, туныктымо пашан ветеранже Р.К. Ялаева ыльыч.

Тунемше-влак чылан шке усталыкыштым тичмашын почын ончыктен кертыч, садлан комиссийлан эн сайжым ойыраш куштылгак лийын огыл. Но тугат кеч-могай конкурсышто сеҥышым рашемдыман. Ончыл верым налше-влак деч молыжым «Шочмо йылмым йӧратыше» номинацийыште палемдышт. Кажне тунемшылан кумылаҥдыше пӧлекым кучыктышт.

Марий Эл Республикысе «Кече-Солнышко» журналын тӱҥ редакторжо Светлана Архипова теве мом каласыш: «Ӱмаште эртыше мероприятийыште йоҥгышо паша-влакым «Эрвий» сборникеш печатлыме. Тенийсе-влакым тӱрлӧ изданийлаш савыкташ шонена».

Кугезына-влак ойленыт: «Йылме ила гын, калыкат ила». Айста меат шке марий йылмынам йӧратена, пагалена, жаплена. Тиде мероприятийым шочмо йылмынам арален кодымаште эше ик кӱлешан ошкыллан шотлаш лиеш, шонем.

Ж. АПКАЛИКОВА, Йылыш школышто марий йылмым да литературым туныктышо.