Талешке-влакым шарнена

26-шо вÿдшор кечын шочмо калыкна Марий Талешке кечым пайремла. Кö тыгай талешке? Тиде кечым кунам палемдаш тÿҥалыныт? Молан 26-шо апрельыште? Нине йодышлан вашмутым пуаш ме 5-ше классыште тунемше-влак дене класс деч öрдыжсö мероприятийым эртарышна. Пайремым кок чолга ÿдыр - Ю. Зайнашева ден А. Шакмаева - вÿдышт. Моло тунемше-влакат öрдыжеш ышт код.

Ю. Иркабаева, Д. Иванов, К. Аликова, А. Айгузина марий калыкын патырышт-влак нерген каласкалышт, Полтыш, Онар, Чумбылат, Акпарс дене палдарышт. Д. Ахмадянов Онар патырым модын ончыктыш. Тудак талешке-влак нерген изирак викториным эртарыш, тунемше-влакын шинчымашыштым тергыш. С. Андреев,

Е. Шамагулов да В. Шайдуллин М. Казаковын, С. Вишневскийын почеламутыштым сылнын йоҥгалтарыш. Кугу Ачамланде сарыште шочмо эл, калык верч кучедалше нергенат монден огынал. Мишкан кундемым чапландарыше Совет Ушем талешке-влакымат шарналтышна. А. Миронов Д. Орайын «Чолга шÿдыр» повестьше гыч Сергей Суворовын монологшым ойлыш.

Талешке - тиде сарыште кучедалше гына огыл. Чыла моштымыжым, поро пашажым, кöргö куатшым шочмо калыклан пуышо, шÿмбел мландынам чапландарыше еҥ-влакымат тиде радамыш пуртен кертына. Презентаций полшымо дене С.Г. Чавайным, Йыван Кырлям, И.С. Ключников-Палантайым да моло-влакымат шарналтышна. Пайрем мучаште тунемше-влак шке чолгалыкыштымат тергышт. Агытан-влак кредалмаш, Йыдал дене модмаш йоча-влаклан пеш келшеныт.

Марий Талешке кечым, тудын историйжым, марий калыкын талешкыже-влакым пайремыште лийше тунемше-влак эре шарнаш тÿҥалыт манын ÿшанен кодына.

О. ИРКАБАЕВА, Чорай селасе Я. Ялкайн лÿмеш марий гимназийыште марий йылме да литературым туныктышо. Мишкан район.