Идалыкын туныктышыжым ойыреныт

Кодшо арнян Уфаште туныктышо-влак коклаште республикысе профессионал мастарлык конкурсым эртареныт. Шке район ден олалаштышт сеҥыше туныктышо-влак заочный да кум очный турышто вийым тергеныт: Уфасе школлаште виш урок-влакым, Образованийым вияҥдыме институтышто мастер-классым ончыктеныт, эссем возеныт, образовательный проектым араленыт, мучашлан эн виян вич туныктышым «Ончыкылык школ - проект-влак школ» йыргешке ӱстел йыр мутланымашке ӱжыныт.

Иктешлыме почеш тений «Башкортостан Республикын идалыкысе туныктышыжо» лӱмым Уфа оласе 39-ше гимназийын англичан йылмым туныктышыжо Эмма Сафиуллиналан пуэныт, тыгак «Башкортостан Республикысе образованийын отличникше» знак дене палемденыт. «Идалыкын руш йылмым да литературым туныктышыжо» конкурсышто Альшей район Раевский селасе 4-ше школышто туныктышо Эльза Шевяхова, «Идалыкын татар йылмым да литературым туныктышыжо» конкурсышто Стерлитамак оласе 20-шо школын туныктышыжо Римма Галиева, «Идалыкын самырык туныктышыжо» конкурсышто Стерлитамак оласе 7-ше школышто информатикым туныктышо Олег Саргаев, «Идалыкын башкир йылмым да литературым туныктышыжо» регион-влак кокласе XXIII конкурсышто Уфа оласе 5-ше лицейын туныктышыжо Нурзиля Надыргулова сеҥеныт. Он-лайн йӱклымӧ почеш «Зритель-влак симпатий» номинацийыште Уфа оласе 30-шо школышто математикым туныктышо Артем Баянов эн шуко йӱкым поген.

Мишкан район гыч конкурсыш райрӱдысӧ Флорид Буляков лӱмеш 1-ше лицейыште тӱҥалтыш класс-влакым туныктышо В.Г. Шамаева миен. Валентина Георгиевна - паша опытым кыртмен погышо туныктышо. Благовещенск педколледжыште да Бирск социально-педагогический кугыжаныш академийыште (кызыт - Башкир кугыжаныш университетын филиалже) шинчымашым погымо деч вара лу ий школышто тырша. Кодший туныктышо-влакын район конкурсыштышт икымше лийын, а тений республикысе профессионал мастарлык конкурсышто коло эн сай туныктышо радамыш логалын. В.Г. Шамаевалан конкурсышто кумшо турыш шумылан да «Профессийлан ӱшанле улмылан» диплом-влакым кучыктеныт.

Мӧҥгӧ пӧртылмекыже, Валентина Георгиевна деч профессионал таҥасымаш нерген шонымашыжым йодмыланна тыге вашештыш: «Конкурсыш селаласе школла гыч икмыняр туныктышо гына логалынна. Тудо мыланем куштылгын эртыш, манаш огеш лий. Конкуренций пеш кугу ыле. Вийым пыштен, чот тыршаш логале. Лектышыжым куандарышылан шотлем. Конкурсышто лиймем могай корно дене вияҥаш кӱлмым рашемдаш полшыш».

Э. АПТУЛМАНОВА.

Снимкыште: В.Г. Шамаевалан кок дипломым кучыктеныт.