Шочмо йылме гоч тӱням ужат, сеҥаш тунемат

Тушто 17 тунемше вийжым терген: кудытшо - Марий Эл Республикысе олимпиадыште сеҥыше-влак, Башкортостан гыч шымытын, Татарстан да Свердловск кундемла гыч кокыт дене миеныт ыле. А Киров область да Удмуртий гыч марий йоча-влакым ты гана ужаш ыш перне. Пошкырт кундемын чапшым мемнан деч посна Краснокам, Калтаса, Янаул районла гыч ик тунемше дене араленыт.

Олимпиадыш мийыше-влакым Марий университетын Калыкле тӱвыра да тӱвыра кокласе коммуникаций институтын директоржо Р.И. Чузаев, Россий Кугыжаныш Думын депутатше, образований да наука комитетын еҥже С.Ю. Солнцева, Марий Эл Республикысе Образований да наука министерствын тӱҥ специалист-экспертше С.К. Свечников саламленыт.

Олимпиада 10 шагатеш тӱҥалын. Кум шагат жапыште тунемшына-влак уло вийым пыштен тыршеныт. Сочиненийым возеныт, лексика, фразеологизм, пунктуаций, фонетика, морфологий, синтаксис дене кылдалтше тӱрлӧ йодышлан вашмутым пуэныт, мутым ужаш да морфологий шотышто, ойлончым синтаксис могырч лончыленыт, рушла гыч марлаш кусареныт. Сочинений-шонкалымашын темыже оҥай лийын: «Кӧ шке йылмыжым ок пале, тудо шке калыкшымат ок пагале» - 9 класс, «Кӧм тачысе марий талешке манаш лиеш?» - 10 класс, «Ончыкылык верч мыят мутым кучем» - 11 класс. Марий литератур дене Олык Ипай лӱмеш кугыжаныш премийын лауреатше, Марий Элын калык писательже-влакым палаш, пуымо текст могай произведений гыч улмым да тудын авторжым чын каласаш, литератур теорий гыч ятыр йодышлан вашешташ, текстым да почеламутым тичмаш лончылаш кӱлын.

Олимпиадым иктешлымашым чон вургыж вученна. Сеҥыше-влакым икте почеш весым ончыко ӱжыныт. Мемнан ӱдырна-влак чотак куандарышт. Марий йылме дене 9 классыште тунемше Анастасия Николаева да марий литератур дене 10 классыште тунемше Наталья Алексеева сеҥышыш лектыч. Ӱдырна-влак чыла деч виян улмыштым эше ик гана ончыктышт. Анастасия Миксонова марий йылме дене 11 классыште тунемше-влак коклаште кокымшо верым нале. Краснокам (Корий школ, 9 класс, марий литератур дене), Калтаса (Амчемучаш школ, 10 класс, марий йылме дене), Янаул районласе школ-влакын тунемшышт (Байгузино школ, 11 класс, марий литератур дене) чыланат призовой верыш логалыныт.

Республикын чапшым аралыше ӱдырна-влакын корнышт тек ончыкыжат эре волгыдо лиеш, илышышт у сеҥымашла дене пойдаралтеш. Туныктышо-влаклан тыге каласыме шуэш: «Тек кажне кечын шуктымо пашада эре куаным гына конда». Шочмо марий йылмынам йӧратымаш, тудым тыршен тунеммаш - ача-авам йӧратымаш дене иктак.

Н. МИНАЕВА, марий йылмым туныктышо.

Тынбай ял, Мишкан район.

Снимкыште (шола гыч пурлашке): Н. Алексеева, А. Миксонова, А. Николаева/