Сайлымашым иктешленыт

БР Кугыжаныш Собранийыш - Курултайыш единый да одномандатный округла гыч кандидат-влакым «ЕДИНАЯ РОССИЯ», «НОВЫЕ ЛЮДИ», «СПРАВЕДЛИВАЯ РОССИЯ - ПАТРИОТЫ - ЗА ПРАВДУ», «ЛДПР - Либерально-демократическая партия России», «КОММУНИСТИЧЕСКАЯ ПАРТИЯ РОССИЙСКОЙ ФЕДЕРАЦИИ» политический партий-влак темленыт. Эше одномандатный округлаште кок кандидат «Российская экологическая партия «Зеленые» да «Родина» партий гыч лийын. Чумыржо региональный парламентын 110 мандатшылан шым партий гыч 844 кандидат да самовыдвиженец-влак кучедалыныт. Сайлыме участкылаште йӱклымашым эскерыше-влак текшыреныт. Территориальный да участковый сайлыме комиссийлаште 14 121 эскерыше лийын. 

БР Рӱдӧ избиркомым вуйлатыше Илона Макаренко сайлымаш кечын эрлашыжлан иктешлыме брифингым эртарен. БР Рӱдӧ избиркомын шотлымыж почеш, сайлымашыш республикыште 52,48 процент калык йӱклаш миен. Политический партий-влакын погымо йӱкышт тыгерак шеледалтын: «ЕДИНАЯ РОССИЯ» - 69,11 процент, КПРФ - 11,65 процент, ЛДПР - 7,74 процент, «СПРАВЕДЛИВАЯ РОССИЯ - ПАТРИОТЫ - ЗА ПРАВДУ» - 7,31 процент, «НОВЫЕ ЛЮДИ» - 3,37 процент, увертара БР Рӱдӧ избирком. 

БР Кугыжаныш Собранийыш - Курултайыш шымше созывлан сайлыме депутат-влакын икымше погынымашышт 5 октябрьыште эрта. Тидын нерген Башкортостан Вуйлык Радий Хабиров арня еда эртарыме оперативный погынымашыште палемден.