Тений сайлымаш кум кече шуйныш

20 сентябрьыште Россий ЦИК-ын председательже Элла Памфилова Увер рӱдерын паша кышкарыштыже Россий Федераций Федеральный Собранийын  кандашымше созыв Кугыжаныш Думышкыжо депутат-влакым сайлымаш кузе эртыме нерген каласкален.

«Тений 51,68% сайлыше йӱклен, - палемден тудо. - Вич ий ончычсо тыгай кампаний дене таҥастарымаште, кугу ойыртем уло. Тиде гана Кугыжаныш Думыш ныл партий огыл, визыт  да тылеч посна шкеныштым шке темлыше-влак деч посна ик мандатан округлаште эше кум партийын еҥышт эртат. Чумыржо Думышто кандаш партийын еҥышт лийыт». 

Федеральный парламентыш логалме верч кучедалше 14 партий гыч визытше - «Единая Россия», КПРФ, ЛДПР, «Справедливая Россия - За правду», «Новые люди» - 5 процентан барьерым эртен, Кугыжаныш Думыш  логалыт.

99,78 процент протоколым шотлымо почеш партийный списке дене «Единая Россия» 49,85%, КПРФ 18,95%, ЛДПР 7,5%, «Справедливая Россия - За правду» 7,45%, «Новые люди» 5,33% йӱкым погеныт.  «Единая Россия» списке почеш 112 мандатым налшаш. Нуно тыгак ик мандатан 198 округышто сеҥеныт. 

Башкортостаныште тений явка 73,9% лийын.

20 сентябрьлан 88,42% протоколым шотлымо почеш федеральный округышто «Единая Россия» 68,05%, КПРФ 14,97%, ЛДПР 6,31%, «Новые люди» 3,09%, «Справедливая Россия - За правду» 2,67%, «Партия пенсионеров за социальную справедливость» 1,16%, моло кандаш партий 1% деч шагалрак йӱкым погеныт. 

Башкортостанысе Рӱдӧ избиркомын председательже Илона Макаренкон мутшо почеш, Салават (96,49%), Благовар (93, 65%), Татышле (92,89%) районлаште, ола-влак коклаште Салаватыште (75,45%), Сибайыште (73,55%), Октябрьскийыште (70,25%) эн шуко еҥ йӱклаш миен.

Кугыжаныш Собранийыш - Курултайыш ешартыш сайлымаште 29-ше Толбазинский округышто шкенжым шке темлыше Загир Хакимов 58,78%, 55-ше Буйский округышто йоча омбудсмен Милана Скоробогатова («Единая Россия») 63,47%, 43-шо Краснохолмский округышто шашист Тамара Тансыккужина («Единая Россия») 54,75% йӱкым погеныт.