+26 °С
Облачно
Самырык тукым
20 Августа , 05:33
Шопперышт - этностиль шӱлышан
Орнамент-влак айдемын паша ӱзгаржым, ӱдырамаш-влакын украшенийыштым акрет годсекак сӧрастареныт. Жап эртыме семын нуно вашталтыныт, пойдаралтыныт. Тачысе кечын нуным декоративно-прикладной искусствышто, вургемыште, архитектурышто кучылтыт. Тудо поснак кумдан дизайныш, модыш шыҥен пурен. А эше орнамент калыкын тӱвыраж дене палдара, историйже нерген каласкала.
Усталык лабораторийыште. Л. Сайпушеван колтымо фото-влак.
«ЧОЛМАН» ГАЗЕТЫМ МАX-ЫШТЕ ЛУДЫНА!
Калык йӱлам да кызытсе саманыште озаланыше модым, иктыш ушен, жап дене тӧр ошкылаш лийме йӧным самырык тукым кодшо арнян Арлан тӱвыра пӧртыштӧ «Шопперым сӱретлена» темылан пӧлеклыме «Этно-мерч» усталык лабораторийыште шымлен. Тушто кеҥеж каникулышто улшо йоча-влак художественный вуйлатыше А.Д. Миранчук да библиотека пашаеҥ Л.В. Сайпушева дене пырля тасма сумкам этностиль дене сӧрастараш тунемыныт. Нуно акрил краска да кистычке дене тасмаш орнамент-влакым сӱретленыт да чиялтеныт. Тиде кечын кажне йоча шкенжым самырык дизайнер семын шижын кертын - чонлан келшыше сӱретым, узорым, тӱсым келыштарен. Тыге кажне ӱдырын шопперже ойыртемалтше сынан лектын. Сумка покшелне вераҥдыме тӱҥ сӱретше веле икгай лийын - тиде башкир калык орнаментын «кускар» элементше. Тудо акрет годсек илыш вийын, тӱзланымашын символжылан шотлалтеш.
«Мыйын сӱретем ямде!»
Тыгай оҥай, пайдале мастер-классым, мероприятий-влакым йоча-влаклан Арланыште тений «Летняя АРТ-пора 2.0» проект дене келшышын эртарат. Тиде проект Президент грант-влак конкурсышто сеҥышыш лектын.
«Шопперым сӱретлена» усталык лабораторийыште йоча-влак искусство тӱням шымленыт, сӱретлыме тӱрлӧ стиль дене палыме лийыныт, калык йӱлам, историйым кызытсе жапын ойыртемже дене оҥайын кылдаш лиймым умыленыт да тидым шке кидышт дене ыштен онченыт. Этностиль дене сӧрастарыме шопперышт сылне, шкешотан лектын. Тыгай сомыл кушкын толшо тукымым калык-влакын тӱвыраштым пагалаш, шымлаш кумылаҥда, тукым кылым пеҥгыдемда.
