+31 °С
Облачно
Самырык тукым
19 Мая , 09:03
Пӱртӱсыштӧ каналтышна
Теҥгече 1-4 класслаште тунемше-влак дене яндар южышто чапле кечым эртарышна, ялысе питомникыш мийышна. Кайымына годым ял воктенсе Васинган ерыште ош йӱксӧ уна-влакым куанен ончышна, корнышто пӱртӱсым шымлаш да эмлык кушкыл-влак нерген шуко уым пален налаш пеш сай йӧн ыле.
Авторын фотожо-влак.
Ме, туныктышо-влак, тунемше-влаклан тӱрлӧ кушкыл, нунын ойыртемышт да медициныште кучылталтмышт нерген каласкалышна. Йоча-влак кушкылын тазалыклан пайдале лиймыжым умылен кертыныт.
Шинчымаш ужаш деч вара яндар южышто канымашым ыштышна. Тиде келшымаш кылым пеҥгыдемдаш да тунемме тургым деч каналташ моткоч кӱлешан тат ыле.
Ӱдыр-влак одуванчик (шӧр саска) дене вуй йыр венокым ыштышт, икте-весыштым пидаш туныктышт.
Икмыняр йоча одуванчик пеледыш дене мӱйым ыштыме нерген палдарыш. Экскурсий гыч у шинчымаш да сай кумыл дене мӧҥгӧ пӧртылынна. У тыгай походлан ӱшанена!