Москва гыч сеҥымаш дене пӧртылын

Наратасты школын 8-ше классыштыже тунемше, Шаран селасе йоча мастарлык да спорт рӱдерын «Эколог-следопыт» творческий ушемыштыже усталыкшым шуарыше Эрвика Минькаева республикысе конкурсышто сеҥыше-влак радамыш логалын. «Марийцы - единственный народ в Европе, сохранивший язычество. На примере марийцев Шаранского района РБ» пашаж дене марий ӱдырым да научный вуйлатышыже Г.Ф. Кучмухаметовам Москваш конкурсын очный йыжыҥышкыже ӱжыныт. Тудын программыже пеш поян лийын, вич кече жапыште конкурсант-влаклан чот тыршаш логалын. Икымше заданий - стендовый сессийын пашаже. Самырык шымлызе икымше турым сайын эртен, жюри тудын пашажым кӱкшын аклен. Кокымшо турышто вийым тергаш эше чот ямдылалташ кӱлын, опытан наставникше дене жюрим мо дене гынат ӧрыктараш у йӧным кычалыныт. Конкурсышто бурят ӱдыр дене палыме лийыныт да выступленийлан пырля ямдылалтыныт. 

Конкурсым торжественно мучашлымаш, сеҥыше ден призер-влакым саламлымаш   Патрис Лумумба лӱмеш Российысе калык-влакын келшымаш университетыштышт эртен. Эрвика ныл номинацийыште сеҥышыш лектын, тудым кок Чап грамот да кок диплом дене палемденыт. Марий ешыште шочын-кушшо ӱдырым да туныктышыжым шокшын саламлена да у кӱкшытыш шуаш вий-куатым тыланена.

Конкурсышто сеҥыше да призер-влакын лӱмыштым кугыжаныш увер ресурсыш пуртат, шымлымаш пашаштым «Исследователь» журналыште да сборникыште савыктат, материал-влакым конкурсын официальный сайтыштыже вераҥдат.