Тау тылат, «Артек»!

Мо тугай «Артек»? - йодыда те. «Артек» - тиде тӱнямбал йоча рӱдер, тудо Гурзуф посёлко воктене, Крымын кечывалвел серыштыже, верланен. Тудым Зиновий Петрович Соловьев негызлен да 1925 ий 18 июньышто почын. Кызыт «Артекыште» индеш лагерь уло - «Янтарный»,  «Речной», «Лазурный», «Озерный», «Полевой», «Лесной», «Хрустальный», «Морской» да «Кипарисный». «Кипарисный» лагерь гыч гына икганаште Адалар-влакат (кӱ курыкан йыгыр остров), Аю-Дагат (Маска курык) койыт. Мыят ты лагерьын профильный турист отрядышкыже логальым. Чыным ойлаш гын, лач «Кипарисныйышкак» логалнем ыле, вет тушто да тыгак «теҥыз» отрядыште эн ушан-шотан да виян ӱдыр-рвезе-влак погынат. 

«Артекыште» элнан тӱрлӧ кундемлаж гыч мийыше ятыр сай ӱдыр-рвезе дене палыме лийым. Пален нальым, кӧ тугай кугурак йолташ - тиде вожатый-влак. Нуно эре мемнан пелен лийыныт, шонымынам шижын, умылен моштеныт, кӱлеш годым полшеныт, туныктеныт, умыландареныт.

Мый 2025 ий декабрь мучаш гыч 20 январь марте «Артекын Рошто йомакше» манын лӱмдымӧ 15-ше сменыште канышым. «Артекыште» кажне смена - тиде изи илыш. Меат ты кечылам пеш оҥайын илен эртаренна, У 2026 ийым пырля шарнаш кодшын вашлийынна. Йырым-йыр озаланыше поро шӱлыш, сылне пӱртӱс, пашам да яра жапым моштен организоватлымаш эреак куан кумылым ылыжтеныт. 

«Артекыш» путёвкым кузе налмем нергенат шукын йодыштыныт. Путевкым налмаште «Заслужи поездку» принципым сайлан шотлем. 2017 ий гыч тидым «Артекын» сайтыштыже «Путёвка» автоматизироватлыме информаций система (АИС) гоч гына ышташ лиеш. Тудо тендан сеҥымашда-влакым акла да рейтингым шотла. Тиде шкешотан проходной балл: кӱлеш рейтингым поген кертыда гын, «Артекыш» оҥай путешествийым суледа.

«А кузе вара школышто тунеммаш?» йодышлан тыге вашештем. «Артекыште» ме уже 9-ше январь гычак умбакыже шинчымашым погенна. Тушто кугу да мотор школ уло. Артековец-влак тудым оралтыже йомак полатым шарныктымылан кӧра шке семынышт «Хогвартс» маныт. Тушто пеш сай туныктышо-влак туныктат. Нуно мыланна моткоч оҥай урок-влакым эртареныт.

Мый лагерьыште шукылан тунемынам, шуко тренироватлалтынам да таҥасенам. Моткоч виян да опытан иктаҥаш-влак коклаште кылдыш техникылан, бухтованийлан, «жумаритлаш», индивидуальный страховко системым чияш тунемынам. Профильный занятий деч посна культурно-массовый мероприятий ден краеведенийланат шуко жапым ойыренна. 

Мыланем лагерьысе тӱшка мероприятий-влакат чот келшышт. Ме Крымысе олалаште шуко коштынна, тоштерлаште тӱрлӧ оҥай экспонат-влакым шымленна. Лагерьыште квест ден спортивно-развлекательный модмаш-влакым эртареныт. Мый ятыр спорт таҥасымаште сеҥышыш лектынам. А моло уста ӱдыр-рвезе-влак почеламутым лудыныт, театральный представлений ден концертлаште участвоватленыт. Йолташем-влакын выступленийыштым ончен, мый элна мучко шуко талантан ӱдыр-рвезе улмылан куаненам. «Артеклан» моштымашнам почын пуаш, ончыкташ полшымыжлан пеш кугу тау!

Смена мучаште «Артекыште» «Чодыра кредалмаш» эртыш. Тудлан ме тыршен ямдылалтынна да профильный занятийлаште тренироватлалтынна. Ты таҥасымаште отрядна икымше верым налын, а мый «Артекысе» чыла лагерь-влак коклаште кылдыш техника дене кокымшо лийым.

Сменым петырыме годым кажне ӱдырлан «Артекын» роза пеледышыжым пӧлеклышт. Тыгай сӧрал йӱлам 2018 ийысе 3-шо смена годым шонен луктыныт. Меат тиде татым эре шарнаш тӱҥалына.

«Артек» - тиде моткоч сылне йомак, оҥай книга, чапле муро. Кажне гана тудо у семын почылтеш. Кӧ кеч ик гана «Артекыште» лийын, тудо моткоч пиалан! Кӧ «Артекысе» чын келшымашым пален налын, «Артек» мурым шарналта да «Мый артековец улам!» манын кугешнен пелешта. Пиалан лийме верыш ик гана веле огыл уэш пӧртылмӧ шуэш. А ме тушто чыланат пиалан лийынна! Тидланат тау тылат, «Артек»!

2017 ийыште, «Артекыште» у сменым почшыжла, РФ Президент Владимир Путин каласен: «Тыште тӱҥжӧ келшен илаш туныктат. Кызыт «Артек» тӱнямбал йоча рӱдер семын палыме, тышке тӱрлӧ эл гыч йоча-влак толыт. Иктаҥашда-влак кеч-кушеч толыт гынат, те палышаш улыда: нуно тендан йолташда улыт». Чынак, «Артекыште» иктаҥаш-влак денат, кугыеҥ-влак денат ваш келшен илаш туныктат, кугем шумек, эллан пайдам кондышо еҥ лияш тыланат.