Лагерьыште кажне кечыже оҥайын эрта

Лагерьыште кок отряд уло, кажныштыже коло ӱдыр-рвезе. «Верные друзья» отрядыште тӱҥалтыш класслаште, «Радуга» отрядыште 5-7 класслаште тунемше-влак канат. Лагерьын кажне кечыже оҥайын да пайдалын эртыже манын, туныктышо-влак уло вийыштым да моштымашыштым пыштат. Спорт мероприятий, экскурсий, тӱрлӧ конкурс, мурымаш да куштымаш - ӱдыр-рвезе-влаклан яра шинчаш жап уке. Лагерьым Людмила Климовна Исламова вуйлата. 

Лагерьыште йоча-влакын икте-весылан полшымо, икоян улмо, келшымаш койыш-шоктышыштым вияҥдаш вожатый ден воспитатель-влак чот тыршат. 13 июньышто Туймаза районышто верланыше «Бабай Утары» этнографий комплексыш экскурсий дене миеныт. Тушто музейым, тӱрлӧ кайык ден янлыкым ужыныт. 18-20 курымлаште татар калыкын илыме пӧрт кӧргымат ончен лектыныт. Йоча-влаклан чылажат оҥай лийын. Экскурсий деч вара кафеш пурен, пицца да тамле когыльо дене чайым йӱыныт. Нойышо, но куаныше йоча-влак касвелеш мӧҥгышкышт пӧртылыныт.