Изи ӱдыр-влак… балыш чумыргеныт

Нунылан Мишкан районысо еш службын да йоча-влаклан модельный библиотекын пашаеҥже-влак тӱрлӧ мастер-классым ямдыленыт. 

Балыш кажне икшыве сӧрал принцесса але йӧратыме йомак герой лийын, тудын вургемже дене миен. «Путник» туризм рӱдерын методистше да туныктышыжо-влак шарнаш кодшо фотом ышташ шар гыч фотозоным келыштареныт. Тыгак самырык принцесса-влаклан конкурс да куштымашан оҥай программым ямдылыме ыле. Тӱрлӧ конкурслаште изи ӱдыр-влак ушан-шотан, йӧным муын моштышо улмышт, сурт сомылым ыштен моштымышт дене палдареныт. Бал мучаште ӱдыр-влак чумыр куштымашыш ушнышт. Нуным чылаштымат шарнаш кодшо да тамле пӧлек дене куандарышна.