Республика Вуйлыкын ёлкышкыжо миеныт

Тений БР Образований министерствын квотыж дене келшышын, мемнан район гыч республикысе тӱҥ ёлкыш 12 йоча мийыш. Тиде Ардаш школ гыч М. Дигитаева, Кугу Соказа школ гыч М. Салиев, А. Искандаров лӱмеш Ирсай школ гыч К. Адылшина, Монар школ гыч Д. Тукбаев, Кемий школ гыч А. Хурматуллина, Изи Накаряк школ гыч С. Ахматгалин, Мишкан селасе Ф. Буляков лӱмеш 1-ше лицей гыч П. Михайлова, Нерге школ гыч П. Миндиярова, Мишкан селасе 2-шо номеран шуко профилян полилингвальный школ гыч А. Удальцова, иза-шольо Беловмыт лӱмеш Тымбай школ гыч Н. Яниева, Чорай селасе Я. Ялкайн лӱмеш марий гимназий гыч И. Юзукбаев, Пӱнчер школ гыч Г. Шамтиев. 

25 декабрьыште «Башкортостан» кугыжаныш концерт залыште йоча-влакым кугу, моторын сӧрастарыме у ий кож вашлийын. Йоча-влакым оҥай йомак герой-влак куандареныт. Ӱдыр-рвезе-влак кож йыр пӧрдыныт, муреныт, куштеныт, «Новогоднее приключение куницы» представленийым онченыт. Нунылан пӧлекым темыме рюкзакым кучыктеныт. Йоча-влак мӧҥгышт куанен, сай шарнымаш дене пӧртылыныт.