«Артек» - тиде оҥай каныш, Шем теҥыз да йолташ-влак!»

Крымыш тӱрлӧ кундемла гыч мийыше ӱдыр-рвезе коклаште кум арня илымаш Анналан мондалтдыме шарнымашым пӧлеклен. Тудо «Тайна золотой параллели» сменыш логалын - «Речной» лагерьысе эн изи ийготан-влакын «Смурфики» отрядыштышт лийын. «Лагерьыштына чылаже 11 отряд погынен. Мый келшен илыше, весела отрядыште канышым. Мыланна кажне кечын тӱрлӧ конкурсым, модмашым эртареныт.

Чыла мероприятийлан уло отряд дене ямдылалтынна, икте-весылан полшенна. Лагерьыште мыланна мотор, икгай тӱсан, «Артек» манын возымо логотипан формым пуэныт, тудым смена мучко чиен коштынна. Эше тушто оҥай кружок-влак пашам ыштеныт, мый «мыловарение» кружокыш коштым», - ойла Аня. Ӱдыр «Артек» гыч ава-ачажлан да акажланат тушто шкенжын кидше дене ыштыме шовыным, скрабым конден, оҥай пӧлек дене куандарен.

«Артекыште» каналтымет гыч можо эн чот шарнымашеш кодо?» йодышемланат Аня кумылын вашештыш. «Тусо кундемыште тӱрлӧ оҥай верлаш - Ялтыш, Севастопольыш, Херсонесыш экскурсийыш мийышна, писатель А.П. Чеховын дачыштыже лийна. Икана лагерьыш кум гана сандалыкыште лийше космонавт С.В. Авдеев миен ыле, тудо мемнан дене пырля Аю-Даг курыкыш кӱзыш.

Мый Крым, Чечен кундем, Донецк калык республика, Ялта, Уфа олала, Москва область гыч шуко йолташым муым, нунын дене тачат кылым кучена, соцлаштыкыште мутланена. А эше мый «Артек. Большое путешествие: 1812» кином возымашке логальым. Тудын сюжетше СССР годсо йошкар галстукан да кызытсе жапысе йоча-влакын канышышт дене кылдалтын. Мемнан дене пырля съемочный площадкыште элысе кумдан палыме актер Роман Постовалов возалте. Тиде кином 2025 ий июль кеҥежым «Артек» тӱнямбал лагерьлан 100 ий темме лӱмгечылан кугу экраныш лукташ шонат», - Шем теҥыз воктене жапым пайдалын да оҥайын эртарымыже нерген каласкалыш чолга марий ӱдыр.