Маша ден Барсик

Мӧҥгӧ толмек, Барсик пырыслан ласка илыш пытыш - кажне кечын иктаж-могай чер дене «черлана». Теве гына пылышыже, вуйжо коршта ыле, ончет, марле дене пӱтырымӧ почан кудалыштеш. Пырысна ик кече ик вере шылын шинчыш, вес кече койко йымач ыш лек, а вара йӧршынат йомо. 

- Кушто мыйын Барсикем? - ик кече ӱдырем воктекем шортын толын шогале. - Ала тудо чынак черле, мыйын полшымемым вуча, а мый тудым ом эмле.

Тудын шортмыжым ужын, кудывечыш Барсикым кычал кайышым. Шуко кычал коштым, а кастене ончем - пырысна шкеак амбар ончык толын шинчын. Чапажым эмгатен, вӱр йога. «Кугу унам» свежа шӧр дене сийлышымат, ӱдыремым кычкыральым.

- Маша, кудывечыш лек. Барсик шкеак тый декет полышым йодын толын!  

Йӱкемым колын, ӱдырем выж-пурак куржынат лекте. 

- Барсик, кушто йомын коштыч? Мый тыйым тунар чот вучышым… 

Но вӱрым ужмек, изиш шекланыш.

- Авай, пырысна мо лийын? - палынеже ӱдырем.

- Ужат, Маша, ынде тудлан чынак тыйын полышет кӱлеш, - ойлем тудлан. А шке пел шинчам дене эскерем, ала мӧҥгӧ савырнен куржеш. Уке-е, тунамак Барсикым изи кидше дене ӧндалын, мӧҥгӧ налын пуртыш. 

Коктын Барсикын чапажым эмлышнат, воктекыжак малаш пыштыш. Тылеч вара ынде Маша пырысым воктечше ок колто. Кочкашат пырля кочкыт, кудывечышкат пырля лектыт. Кызыт Барсик «карантиныште».