Самырык тукым - калыкын ончыкылыкшо

Кажныжым тӱрлӧ ужашлан шеледыме: коммуникаций (Интернет дене тугок пайдаланаш йӧн, самостоятельный пашалан автоматизироватлыме паша вер), интерактивный сомыллан (лекцийым, дискуссийым, семинарым, мастер-классым, выставкым эртарыме площадка), мутланашлан йӧнан вер-влак. Нине рӱдер-влак пашаштым ныл корно дене намият: профориентаций, патриотизм шӱлышан воспитаний, вер-шӧрым шымлымаш, ешын поянлыкшылан шӱмаҥдымаш. Проектым илышыш шыҥдарыме жапыште 100 утла мероприятийым эртарышна. Тыгак районысо тӱрлӧ организаций - образований, тӱвыра пӧлка-влак, калыклан паша верым муаш полшышо рӱдер, агропромышленный колледж да моло - дене пашам пырля ворандарыме нерген соглашенийым ыштышна. Кум библиотекыштат кодший ноябрьыште ачалыме пашам шуктышна. Ноутбукым, креслым, МФУ-м, проектор ден интерактивный доскам, зонирующий стеллаж-влакым нална. Интерактивный оборудований мемнан библиотека-влаклан, ончычсо йӧн деч кораҥын, мероприятий-влакым эртарашлан, у интегрированный средаш куснашлан йӧным пуа. Библиотекылаште самырык ӱдыр-рвезе, волонтер-влак кокла гыч инициативный тӱшкам чумырышна. 

Проектым май мучашыште рӱдӧ библиотекыште «Время молодых» районысо мероприятий дене иктешлышна. Мишкан селаш район гыч, тыгак полилингвальный шуко профилян 2-шо, Ф. Буляков лӱмеш 1-ше лицейын 8-11 класслаштыже тунемше, агропромышленный колледжын студентше-влак - чылаже 289 самырык еҥ чумыргыш. Тиде кечын самырык-влак тӱрлӧ мастер-классыште шуаралтыч. Тыгак ныл проект дене палыме лийна. Изи Накаряк ялысе библиотекын пашаеҥже С. Васильева самырык-влакым патриотизм шӱлышеш куштымо нерген «Преемственность поколений защитников Отечества» проект (Тудлан кӧра Кугу Ачамланде, Афган, Чечен да Украинысе СВО-н салтакше-влакым шарныме пырдыжым ыштеныт.) дене палдарен. Уфасе наука да искусство университетын 3-шо курсын студентше Д. Бикбулатова Янагуш ялысе библиотекын «Моя малая Родина» проектшым (Селам шымлыме да тӱзатыме, электрон летописьшым ыштыме.) ончыктен. Рӱдӧ библиотекын пашаеҥже Айгуль Зайдуллинан «Профориентация - от ремесленничества до инноваций» проектшат кӱлешан: тудо вуеш шудымо икшыве-влаклан ончыкылык профессийым ойыраш полша, районлан кадр-влакым ямдылыме йодышым тарвата. Мишкан селасе Ф. Буляков лӱмеш 1-ше лицейын 10Б классын тунемшыже да волонтержо К. Ветлина рӱдӧ библиотекын «Дом семейных традиций» проектшым аралыш, районышто илыше тӱрлӧ калыкын тукым кокласе кылым, еш поянлыкым арален кодымын кӱлешлыкшым палемдыш. 

Самырык-влакын форумышт талантан, чолга, вий-куатан ӱдыр-рвезе-влакым иквере ушен шога. Рӱдӧ библиотекын площадкылаштыже нуно лэпбукым ямдылыме, шер гыч кидшолым пидме, порсын тасма дене тӱрлымӧ, тӱрлӧ калык куштымашлан туныктымо мастер-классыште шуаралтыч. «Еш» рӱдерын психологшо илышыште кӱлешан йодыш-влак почеш психологий модмашым эртарыш.

Форумышто кажне ӱдыр-рвезе шкаланже мом-гынат уым почын, кӱлешаным, пайдалым, у сеҥымашлан кумылаҥдыше шинчымашым налын кертын.