Марий йылмым изинек йӧратен тунемеш

Даша 9 классыште тунемеш. Шочмо йылмым йӧратыме кумылжо изинек ешыште, йочасадыште, вара школышто вияҥын. Шымше класс гыч тӱҥалын, Даша районысо олимпиадыште эре сеҥышыш лектын. Тений федеральный кӱкшытыштӧ вийжым терген ончен. Пошкырт кундемыште шочмо йылме дене олимпиада Уфа олаште, Башкир кугыжаныш университетыште, 2 мартыште эртен. Кажне классыште шӱдӧ утла ӱдыр-рвезе лийын (8-11 класслаште тунемше-влак шинчымашыштым тергеныт). 

Тыгай олимпиадым 2021 ий годсек нылле тӱрлӧ: марий, руш, татар, пошкырт, авар, алтай, даргин, карел, эвен, чечен да моло - йылмыла дене эртарат. Олимпиада кок йыжыҥ гыч шога. Икымше йыжыҥже MOODLE платформышто дистанционный йӧн дене, тестирований семын ноябрь гыч январь марте шуйна. Кокымшо йыжыҥ - очный, мартыште тӱрлӧ площадкылаште лиеш. Тений тунемше-влак, ик жапыште шинчын, кум вере шинчымашыштым ончыктеныт: Татарстанысе-влак Казанский федеральный университетыште, Марий Элыште Марий кугыжаныш университетыште, Пошкырт кундем Башкир кугыжаныш университетыште олимпиадым эртарен.