Ковамлан таза лияш тыланем

Ковамын лӱмжӧ - Римма. Тудо кудло кандаш ияш улеш. Кувавайым кугезе ковам шкетын ончен куштен. Йоча жапше куштылго лийын огыл гынат, Римма ковам сайын тунемаш тыршен, туныктышыжо Саки Микаевна Микаева лийын. Тудо шкетын илен, садлан ковам Аниса Каникова йолташыж дене туныктышышт дек шошым пареҥгым шындаш, шыжым лукташ, пакчасаскаш вӱдым шаваш полшаш коштыныт. Тунемме годымат нуно туныктышыштлан тетрадьым тергаш полшеныт. Туныктышышт ик тетрадьым образец семын терген ончыктен, тыге ковам ден йолташыже, тудым ончен, кодшо тӱшка тетрадьым тергеныт. Отметка-влакым туныктышышт шке шынден. 

Кеҥежым ковамын суртыштыжат паша шуко лийын. Модмо кокла гычак чылан шке пакчашкышт кас еда вӱдым шаваш тарваненыт. Пакча шеҥгеч эҥер йоген эртен. Изи ведрашке корка дене оптен наҥгаен, ковыштанеш да помидореш вӱдым шавеныт. Теле каныш кечын, издерым шӱдырен, коремыш мунчалташ погыненыт.

Индеш классым тунем лекмеке, куваваем аваже олмеш фермыш ушкалым ончаш кошташ тӱҥалын. Тушто ӱмыр мучко пашам ыштен. Пашаже пеш неле лийын, садлан кызыт ковамын кидше-йолжо корштат.

Школ гыч мӧҥгӧ пӧртылмешкына, Римма ковам мемнам кажне кечын шокшо кочкышым ямдылен вуча. Мый ковамым пеш йӧратем, тудлан таза лияш тыланем.