Марий ӱдыр «Артекыште» каналтен

Анастасия «Артек» тӱнямбал йоча рӱдерыште коло ик кече каналтен. Тушто лийме жап ӱдырлан оҥай шарнымашлан поян. «Артекыште» мый кум арня, 22 январь - 12 февраль кечылаште, каналтышым. Тушко у идалыкын икымше - «Артек в Новый век» лӱман сменышкыже - логальым. Мылам, спортлан шӱман ӱдырлан, тусо МЧС профиль лишыл лийын, садлан отрядымат тугайым ойырышым. «Артекыш» кумда элнан тӱрлӧ-тӱрлӧ кундемлаж гыч эн чолга, ушан, тыршышан самырык ӱдыр-рвезе-влак логалыныт. Тушко у регион - Донецк, Луганск, Запорожье да Херсон кундемла гычат - тунемше-влак миеныт ыле», - палдара Анастасия.

Самырык тукым чыла вере шуаш тырша - лагерьыште йоча-влак шинчымашыштым пойдареныт, тунемашат, каналташат жапым муыныт. «Смена моткоч оҥайын эртыш. Артекысе школышто тунемме занятийлаште самостоятельный, контрольный паша-влакым ыштышна, уш-акыл пӱсылыкым тергышна, тидлан отметкымат шынденыт. Тунеммаш деч посна мемнам Севастополь герой-олаш экскурсийыш намийышт. Тушто «Федюхины высоты» паркыште, «Подземный Севастополь» музейыште лийна. Тыгак Никитский ботанический садыш, Ливадийский полатыш мийышна. Ботанический садыште экскурсовод шуэн вашлиялтше ятыр кушкыл ден пушеҥге-влак нерген каласкалыш. Ме ботанический садыште кушшо эн кӱкшӧ пушеҥгым ужна, тӱняште эн кугу пушеҥге нерген шуко уым пален нална. Вес эллаште кушшо бамбукым, Гималайысе кедрым, пинийым да моло ӧрыктарыше кушкылым шке шинча дене ужаш моткоч оҥай ыле, - каласкала Анастасия. - А Ливадийский полатше Ялта деч кум километр ӧрдыжтӧ, Шем теҥыз серысе Ливадия поселкышто, верланен. Тиде Российысе император-влакын ончычсо кечывалвелысе резиденцийышт. Тудым XX курым тӱҥалтыште Н.П. Красновын проектше почеш итальян стиль дене келшышын чоҥеныт. Экскурсовод мемнам полатын историйже дене палдарыш, тусо пӧлем-влакым ончыктыш. Эше ме Артек пелен верланыше историй, Космонавтика, тыгак краеведений музейлам, икмыняр гана Суук-су полатым ончен савырнышна».

Смена мучашке лишемме годым чыла отряд Артек-Аренын сценыштыже «Чеверласыме деч ончыч вашлиймаш» йӱлаш пурышо мероприятийыш чумырген. Самырык ӱдыр-рвезе-влак илышыште мо эн шерге улмо нерген шонкалаш таратыше «Слова» спектакльым онченыт. Туштак кажне артековецлан шарнаш кодшо символым - Артекын роза пеледышыжым - кучыктеныт.

«Артекыште» мый кугу элнан тӱрлӧ вер-шӧрыштыжӧ илыше ӱдыр-рвезе-влак дене палыме лийым, у йолташ-влакым муым. Тӱнямбал йоча рӱдерыште каныме жап илышын кажне татшым аклаш туныктыш, вожылмаш койыш деч кораҥаш, шкем личность семын ужын умылаш полшыш. Мый тушто шӱм-чон дене каналтышым. Смена мучаште йӧратыме ешемым сагынен-йокрокланыме шижмашланат вер ыле... «Артек», тый чоныштем волгыдо кышам коденат! Ӱдыр-рвезе-влак, тушко логалашак тыршыза, вет тиде шарнымаш ӱмырешлан…», - ойла чолга ӱдыр.