Ош куэм гыч ургымо куштылго тувыр-влак выставкым ужаш мийыше-влакланат келшеныт - ончалза, нуным чиен возалтше ӱдыр-влак могай ковыра койыт. Чынжымак, нуным кеч-кушко чиен каяш лиеш! А тыглай тувырым марий сын дене пойдараш ӱдыр тӱрлеман оҥсакышым шонен муын. Туштыжо мыланем эн чот эрвелмарий тувырысо гай «лудынеран» изурвалтыже келшыш. Тиде - дизайнерын тукымвожшым ушештарыше шкешотан ойыртем. Юлиян аваже, Виктория Мамеева (ӱдыр фамилийже Ирдуганова) - Илиш район Анач ялын шочшыжо. Мамеевмытын ешышт Киров кундемыште ила гынат, изи ӱдыр аважын шочмо кундемышкат, коча-коважын илыме Нефтекамск олашкат ик гана веле огыл унала толын коштын.
Юлиян ыштыш-кучышыжым вигак палаш лиеш - тудын шкенжын ойыртемже, брендше уло. Тудым самырык дизайнер икмыняр ий годсек вияҥден толеш. Кызыт Озаҥысе калыкле шымлыше технологический университетын Куштылго промышленностьын технологийже-влак, мода да дизайн институтыштыжо кӱшыл шинчымашым налше ӱдыр Озаҥ олаште ила да пашам ышта, шке мастерскойжым почын.