Самырык-влаклан полатым почмо

Теҥгече, 24 январьыште, Нефтекамск олаште «Регион для молодых» программа полшымо дене Самырык-влакын полатыштым ачалыме деч вара уэшын почмо. Ончычсо полат тӱжвал тӱсшӧ дене гына огыл, лӱмжӧ денат ойыртемалтеш - «Дом молодежи» маналташ тӱҥалеш. 1985 ийыште чоҥымо полатлан капитальный ачалымаш кӱлын: тушто электросистемым, ончымо залым, пӧлем-влакым, фасадым тӱвыт уэмдыме. Тылеч посна йӱкым да волгыдым пуышо оборудованийым налме. Студент-влакын кечышт лӱмеш оласе тӱрлӧ заведенийыште тунемше-влак тунемаш ойырен налме профессийышт могай кӱкшытыш шумышт нерген раш каласкалышт.

Самырык-влакын политикышт шотышто кугыжаныш комитет председательын пашажым шуктышо В.Ф. Сабиров, ола администраций вуйлатышын социальный йодыш шотышто алмаштышыже А.Ф. Фазлыев саламлымашке ушнышт. Самырык-влакын пӧртыштӧ концерт, фестиваль, мастер-класс, семинар, усталык вашлиймаш да моло шуко тӱрлӧ мероприятийла эрташ тӱҥалыт.