Кова олмеш телефон

Мыланем кова - куптыр чуриян, пӱгыр тупан шоҥгыеҥ. А кызытсе йоча-влакын «ковашт» - интернет. Тудо «пукша-йӱкта», урокым ышташ, жапым эртараш полша. Икманаш, икшыве-влакым телефон «онча». Ӱдыр-рвезе-влак телефонлан кӧра кечыгут мӧҥгыштӧ шинчат, тушечынак илаш тунемыт. Кочмет шуэш - иктаж видеом ончет да шолтет, мӧҥгысӧ пашамат тугак ыштет. Но тыгодым телефонын вес могыржат уло. Кызытсе икшыве-влак торжа, шыдан, чаманен моштыдымо улыт маншаш уке. Чылажат тиде телефонлан кӧра. Паҥга олмеш чонан еҥ воктен шукырак лийыт, кӱлеш годым кова-кочаштын чон шокшыштым шижыт гын, илышат тыгай торжа ок лий, самырык ача-ава-влаклан илашат куштылгырак лиеш ыле дыр. Илен-толын, кова-коча да уныка-влак кокласе кыл торла да тукымат йотештаралтеш докан.