Изи падыраш мураш йӧрата

Начарын ужшо икшыве-влаклан фестивальым тарваташ кумылаҥдыше еҥ - Российын калык артистше Диана Гурцкая. «Тиде фестивальыш кажне ийын шукырак еҥ ушна. Тений ойыркален налме турышто 11 эл гыч 500 наре икшыве шке вийжым тергыш, финалыш моло ийла деч шукырак участникым - 73 самырык ӱдыр-рвезым ӱжна. Изи артист-влак пелен творческий наставникышт семын Зара, Алсу, Шаман, Денис Майданов, Анита Цой, Сосо Павлиашвили да молат выступатлышт», - иктешлен фестивальым Диана Гурцкая.

Изи Машалан ойыркален налме турышто мураш логалын огыл, тудым аважын ончылгоч колтымо видеожым ончен ӱжыныт. А фестиваль нерген тудо Маша ден Радмирын вокаллан туныктышышт Г.З. Стерхова деч пален налын да эше февральыштак тушко ушнаш йодмашым возен.

Маша - ойыртемалтше ошалге чурийвылышан, ош ӱпан ӱдыр. Тыгай ойыртемжылан кӧра ача-аважлан тазалыкше верч чотрак тургыжланаш верештеш. «Ӱдырна кок ияшыж годымак пӧртыштӧ эре мура ыле: модеш - мура, коштеш - мура… Ныл ий шуде, мый тудым Йоча да самырык-влакын усталык полатышкышт намийышым. «Пеш изи вет, тек изиш кугемеш», - маньыч. Но вара колышт ончышт да вигак заниматлаш тӱҥалаш келшышт. 

Маша пеш чот мураш да мутланаш йӧрата, чыла мутым раш каласен ок шукто гынат, марлат, йот йылме денат мурен пуэн кертеш. Кужу текстым писын ушешыже шыҥдара, садлан йочасадыште сценкылаште чӱчкыдын тӱҥ рольым модаш ӱшанат. Ик жап йочасадыш огына кондыштаре гын, йӱкшым колын, «Изи шӱдырна толыныс» манын, шыргыжал вашлийыт. Ме шкеже тынар огына муро, но Маша, очыни, кочам гай лийын. Тудат тыгаяк ошалге чурийвылышан улмаш. Шкаланже шке скрипкым ыштен, эре шоктен-мурен, вара содыки чын скрипкымат налын кертын, маныт», - ойла Любовь Баяновна.

Маша сцена деч огеш лӱд, вет вич ияш изи падырашлан конкурслаштат вийым терген ончаш йӧн лийын. Уфаште «Звезда Башкортостана», «Таланты Башкортостана. Оскар-2022», Ижевскыште «Орбита талантов» конкурслаште 1-ше степенян лауреат лӱмымат сулен шуктен. Москвасе гала-концерт годымат утларакше пеленже мийыше ача-аваже тургыжланеныт, а тудо шкенжым моткоч ласкан кучен, репетиций деч вара «Эше сценыш лекнем» манын ойлен. «Теве уэш лектат», - лыпландарен аваже. 

Финалыште мурышаш мурын фонограммыжым шым еҥлан, тыгак Машаланат, ончылгоч колтеныт да вара нунын кокла гыч кок еҥжым ойырен налыныт. Маша сценыште Анастасия Макеева дене пырля мурен да вара ятыр лӱмлӧ мурызо дене пырля шогал возалтын. Тыгай тат ӱмырешлан шарнаш кодеш. Изи шӱдырын фестивальыште выступатлымыжым меат ужын кертына, вет «Белая трость» XIV Тӱнямбал благотворительный фестивальын гала-концертшым Рошто пайрем кечылаште Россий телевидений дене «НТВ» федеральный каналыште ончыктат.

Мурзагареевмытын ешышт денат лишкырак палдарынем. Любовь Баяновна Шаран район Емметыште шочын-кушкын, Евгений Валерьевич Агидель олаште кушкын гынат, тудынат ача-аваже Емметын улыт. Кызыт самырык еш Нефтекамскыште ила. Суртозан Йӱдвел кундемыш пашаш кайымыж годым еш илышым пелашыже виктара, Милана ден Мариям школыш, йочасадыш да кушташ-мураш кондыштара.