Тӱҥжӧ - йоча-влакын тазалыкышт

Ик чапле да мотор шыже кечын Келтей школышто Тазалык кечым эртарен колташ йӧн лекте. Могай куан, вет тиде кечын йоча-влак школышко тунемаш огыл, канаш толыт! Туныктышын паша  ойыртемже - ӱдыр-рвезе-влакым ушым погышо,  ончыкылыклан ӱшанле айдемым кушташ,  чын негызым пышташ полшаш.  А тазалык деч посна тиде паша ончыко ок кай. Туныктышо-влак  нуным шуарен, ик ойыш шуын туныктышаш улыт. Тунам урокшат веселан да пайдалын эрта. «Таза капыште - таза уш», - ойлат калыкыште. Эн тӱҥжӧ - ме йоча-влакын тазалыкыштлан тӱткышым ойырышаш улына. 

Тӱҥалтыш школышто пашам ыштыше туныктышо-влак З.И. Сенькина, мый, Э.К.  Калямшина, Л.С. Бузулуцкая тиде пашалан ончылгоч ямдылалтна. Тазалык пайремым эртарашлан кӱлешан арверым ямдылышна. Йоча-шамыч тиде кечын уло кумылын школ омсам почын пурышт.  Туныктышо-влак нуным тазалыкым шуарыме радам дене палдарышт. Тыге ий гыч ийыш тазалыкым пеҥгыдемдыме йӱлаш пурышо мероприятий ӧрдыжеш ыш код. Йоча-влак, кок тӱшкалан шелалтын, уло кумылын куржтальыч, туштылан вашмутым кычальыч, мечым оҥгыш кудалтышт, таҥасен куржтал модыч. Тазалык кече пайдалын эртыш.

Тек мемнан школыштат, моло вереат йоча-влак таза лийыт, а туныктышо-влаклан чытымашым да усталык шӱлышым тыланем!