1 июнь - Йочам аралыме тӱнямбал кече

Мику ден Марпа кува

Шем пыл, вузалын, йырым-йыр пычкемышым шара. Волгенче тул солаж дене солкален лишемеш. Мику ден коваже окна деч торашкырак, авагашта деч ӧрдыжкырак, лияш тыршат. Марпа кува, «высмылам» пелешткален, коҥга воктенсе кужу теҥгылеш верлана, воктекше Мику пызна.

- Кувавай, каласе, тый волгенче деч лӱдат?

- Лӱдде мо, волгенче дечын кузе от лӱд? Тудо - Юмо кочанан солаже, но тыглай огыл - тул сола.

- А молан тудлан сола кӱлеш?

- Туштат, кӱшнӧ, мемнан семынак илат. Вольыкыштат уло. Тудым Йыван изат семын сола дене поктат. Кӱдырчан годым шкет пушеҥге але кӱртньӧ ора воктеке шогалаш ок йӧрӧ. Юмо кочан сола мучашыже логал сеҥа.

- Молан лачак шкет пушеҥге але кӱртньӧ ора воктеке?..

- Кхм, шуко палаш тыршымым Юмо коча ок йӧрате. Сита, шып лий.

Моло йодышыжым Мику шкак шонкален рашемдаш тырша. Юмо нерген аважын, коважын пелешткалымым коклан ондакат колын. «Тугеже вольыкшат, солажат уло. Эҥерат, кӱварат лийшаш дыр. Саде кӱвар гоч Юмо коча кугу вочко-влакшым пӧрдыктен-пӧрдыктен колтымылан, очыни, дӱр-дӱр шокта. Коклан ала-момат пудештара, витне».

Кӱдырчан йӱр эрта, да адак кече йымыжан ончалеш. Мланде ден кава моторештын волгалтыт. Мику ден коважат, йывыртен, тӱгӧ вашкат.

- Кувавай, кӱшнӧ - мотор пӱгӧ. Тудым Йыван изам шонанпыл манеш.

- Чын, шонанпыл, але Юмо кочан вӱдвараже. Ик эҥер гыч да вес эҥер гыч вӱдым кошталешат, мландым, мемнам чывылта.

Нимом от ман, кован йомакше сӧрал. Ала йомакат огыл, ала ожнысекак тыге каласкалыме тукым гыч тукымыш куснен толеш. Але теве ӱстелыш уло могырет дене эҥертен, я окна лондемыш кӱзен шинчын ончо-я, уныкам манын ок шого, кувава тыманмеш шӱрден волта.

- Мо вара лиеш? - молан ок йӧрыжым Мику пеш умылынеже.

- Ӱстел киндым нумалеш, тугеже молан эше тыйын лавыран капетым нумалшаш? А окна лондем - мемнан суксына-влакын верышт. Шке суксет ӱмбак кӱзен шичнет ыле мо?

Марпа куван ойлымылан Мику ӱшана гынат, уке гынат, ушешыже, шӱмешыже садак лакемалт кодеш. Лакемалт кодеш да шкем шот дене кучаш, шкем пагален мошташ сай урок лиеш.