Школышто медиаресурсым кумдан шараш манын, «Взгляд» команда «Тв-Мэктэп» проектым арален. Конкурсышто сеҥымаш нунылан сылне фото ден видеом возаш, усталык шӱлышыштым илышыш шыҥдараш йӧным пуэн кертеш. «Полёт» команда «Образовательные события» проектым ончыктен. Тунемме верыште эртарыме тӱрлӧ мероприятий-влак школ илышым утларак оҥайым да пайдалым ыштышаш улыт. «Пуля» команда «Электрон тир» проектым ямдылен. Командыште улшо ӱдыр-рвезе-влак «Тиде оҥай спорт, садлан виртуал тир тунемше-влак коклаште кугу йодмаш дене пайдаланаш тӱҥалеш» манын шонат. «Патриот-влак» команда «Таче школын, эрла элын патриотшо» проектым ончыктен. Проектын тӱҥ задачыже - тунемше-влак коклаште патриотизм шӱлышым вияҥдымаш. «Генераторы идей» команда «Оҥай пачаш» проект дене палдарен. Командын чолга еҥже-влак школын кажне пачашыштыже каныме верым йӧнештарынешт. Тиде электрон книгагудо, ӱстембал модыш-влак да молат. «Бум» команда «Креативный бум» проектым арален, тудын полшымыж дене тунемше-влак школым эшеат сӧралым ыштынешт. Нунын девизыштат ойыртемалтше: «Йокрокланаш ок кӱл!»
Йӱклымашын лектышыже почеш конкурсышто «Тв-Мэктэп» проект дене «Взгляд» команда сеҥышыш лекте. Ынде нунылан школын чапшым тунемше-влакын инициативышт дене негызлалтше республикысе проект-влак конкурсышто аралыман. Тунемше-влаклан пиал шыргыжалеш манын ӱшанена да сеҥымашым тыланена!