Мланде - тичмаш
кинде сукыр.
Ме модына лоштен.
Мланде - эртак пеледыш -
Ме коштына тошкен.
(В. Изилянова.)
Шке куштымо емыж ден пакчасаска эн тамле лийыт, маныт. А йочан ончен куштымо сылне пеледышыжым тодылашат, тошкашат чаманет. 20 мартыште экологий проектым тӱҥалмына годым лач тиде шонымаш тӱҥ ыле. Тунам ме ныл-вич ияш йоча-влак дене пырля яшлыкеш георгин нӧшмым ӱдышна. Тиде пеледышын пушыжо уке да петуний дене таҥастарымаште нӧшмыжӧ изиш шолдырарак - изи ӱдыр-рвезе-влак парня дене кучен кертыт. Кок кече гыч шем рок ӱмбалне изи ужар лышташ-влак кояш тӱҥальыч. А кок арня эртымек, йоча-влак дене пырля нӧргӧ кушкылым стаканыш кусарышна. Ынде кажне йоча шке кусарыме пеледышыжым онча: вӱдым шава, рокшым пушкыдемда. Кушкылыштым нуно стаканеш пижыктыме наклейка гыч палат. Кече шокшемдымек, георгин озымым йочасадысе клумбеш шындена. Да кеҥеж мучко ӱдыр-рвезе-влак, икияш пеледышым ончен куштышыла, пӱртӱсым шымлат да моло кушкылымат кӱраш чаманаш тӱҥалыт манын шонена. Проектна 20 сентябрь марте шуйна.