Усталыкышт келшымаш аршашыш ушнен

Тыгай  мероприятийым эртараш Калык-влакын тӱвыра инициативыштлан полышым пуышо Президентын фондшо йӧным ыштен. Эртыше идалыкыште Межпоселенческий тӱвыра да яра жап шотышто рӱдер тудын грантшым сеҥен налын. Проектым илышыш шыҥдараш тӱвыра пашаеҥ-влак йоча-влакым ямдыленыт - хореографий, вокал, семӱзгар дене шоктымо, сценыште сылнын ойлымо мастер-класс-влакым ончыктеныт. Райрӱдыштӧ ондак фестиваль-конкурсын отборочный туржым эртареныт. Тушто тӱрлӧ калыкын талантан икшывыже-влак муреныт, куштеныт, семӱзгар дене шоктеныт, актер семын шуаралтыныт. Эн уста, ойыртемалтше икшыве да коллектив-влак гала-концертыште усталыкыштым ончыктеныт.

Фестиваль-конкурсын лектышыже почеш, сеҥыше-влакым тӱрлӧ номинацийыште ойыреныт. «Вокал» номинацийыште 1-ше вер дене Калтаса села гыч «Мелодия», 2-шо вер дене Кутерем села гыч «Позитив» ансамбль-влакым, 3-шо вер дене Кӧкыш ял гыч Юлиса ден Константин Тосаевмытын вокал дуэтыштым палемденыт. «Хореография» номинацийыште 1-ше верыш Ӱлыл Качмаш гыч «Фантазия», 2-шо верыш Кӱшыл Тыхтем гыч «Тюрагай», 3-шо верыш Ӱлыл Качмаш гыч «Ош пеледыш» да Калтаса села гыч «Аллегро» коллектив-влак лектыныт. «Сылнымут» номинацийыште 1-ше верым Калтаса села гыч К. Котова, 2-шо верым Ӱлыл Качмаш гыч А. Ижбулатова, 3-шо верым Калегин ял гыч Э. Валикаева сеҥен налыныт. Фестивальыште тыгак «Калыкын кумылжым савырымаш» посна номинаций да  спецприз дене Амчемучаш ял гыч «Ший оҥгыр» вокально-инструментальный ансамбльым палемденыт. Конкурсышто усталыкыштым ончыктышо йоча-влакым пӧлек сертификат, кубок да диплом дене суапландареныт. 

Калтаса район.