Все новости
Самырык тукым
25 шорыкйол 2023, 12:20

Йолташ-влакын мыскарашт

Студент пагыт - эн сылне жап. А кунам тый вес кундемыште тунемат, эше оҥайрак.  Марина теле канышлан шке ялышкыже унала тольо. Ава пелен сай, садлан кок арня каныш пеш писын эртыш. Тунемаш каяш пагыт шуо. Аваже молгунамсе гаяк кугу сумкаш пареҥгым, кешырым, йошкарушменым, шоганым да молым тич оптен ямдылыш. Марина Йошкар-Олаште Тӱвыра да сымыктыш колледжыште тунемеш, Маргарита Медикова гай артист лийнеже.

Студент пагыт - весела жап! Еш архив гыч налме фото.
Студент пагыт - весела жап! Еш архив гыч налме фото.

Марий Элыш корно кужу, садлан кечывалым кайыме годым Марина шке кундемын ямле верлажым, пӱртӱсым ончен каяш йӧрата. Но кече кӱчыклан кӧра вашке пычкемышалтеш, корнышто ала-мыняр гана нерен налаш лиеш. Тораште огыл оласе тул-влак кояш тӱҥальыч, миен шуаш шуко кодын огыл.

Марина моло студент семынак тӱшкагудышто ила. Тудо вокзал деч тораште верланен. Йӱдым веле толын шумылан автобус-влак шукертак  коштмым чарненыт. Неле сумка дене писын миен шуаш манын, сото телефоныштыжо такси номерым кычал муо да йыҥгыртыш.

- Мылам вокзал гыч Красноармейский урем марте каяш кӱлеш, - ойлаш тӱҥале Марина. 

- Мыланна вокзалыш пураш ок лий, корнышко лекса, - вашмутым кольо. 

«Кузе ок лий? Теве гына мыняр такси ончычем эртен кудале», - шоналтыш шке семынже Марина. Уремыште пычкемыш, садлан, неле сумкажым шӱдыренак, ӱдыр кугу корныш лекте. Но корнышто нимогай автомашина ок кой. Уэш йыҥгырташ тӱҥале, но трубкасе оператор «Окса ок сите…» манын вашештыш. «Кузе ок сите? Нимом ом умыло, теве гына йыҥгыртышымыс», - шона шке семынже. Ынде лу минутат эртыш, нимогай автомашина уке. Теве йот номер шке йыҥгырта. 

- Алло, те кушто улыда, мый тендам вучем, - вес могырышто шокта пӧръеҥ йӱк.

- Мый корно воктенак остановкышто шогем. Тушто эше 1-ше номеран троллейбус шогалеш, - пеш умылтараш тӧча Марина. 

Трук трубкаште пӧръеҥын шыде йӱкшӧ шергылте: 

- Могай остановко, могай троллейбус… Те могай олаште улыда?

- Йошкар-Олаште, - лӱдын пелештыш Марина.  

- Могай Йошкар-Ола? Те Пӱрӧ олаш йыҥгыртенда!

Ик пагыт Марина шып шогыш: ала шорташ, ала воштылаш… Но тунамак воктекыже вес такси толын шогале. Тӱшкагудыш миен шумек, пырля илыме йолташ ӱдыр-влаклан воштыл каласкалыш. А нуно мыскарам ыштеныт улмаш. «Пӱрӧ оласе таксим» телефонышто «Йошкар-Ола такси» мутыш савыреныт. Теве тыгай весела студент пагытым шарналташ веле кодеш. 

Автор:Л. БАЙРАМОВА. Нефтекамск ола.
Читайте нас: