Лек, йолташ, курык гыч мунчалташ!

Телымат чодыраште але пакча шойылно ече, издер дене мунчалтыше йочам шуэн ужаш лиеш. Изирак да калык шагал илыман яллаште, мутлан, кеҥежым веле уремлаште йоча-влакын весела йӱкышт солна. Тугодым ола гыч каникуллан толшо йоча-влакат шукемыт. 

Ты гана телым каныш кечылан кова-коча дек унала толшо изи ӱдыр-рвезе-влак дене пырля ялысе икшыве-влакат тыге курыкышто мунчалтыме сӱрет шинчалан перныш. Йоча-влаклан пырляште весела: юарлат, ӱчашат, шӱлеш-шӱлешт курыкыш кӱзат. Кугурак тукым яллаште ончыч издер, ийдер дене мунчалтеныт гын, тачысе йоча-влак курыкыш «ледянка», «снегокат», «тюбинг» («ватрушка») манме мунчалтыме арверыштым шӱдырен куржыт. Яндар южышто тарванылын, мутат уке, йогыланашат жапышт ок код, шкаланыштат оҥай, да тазалыкланат пайдале. 

Тошто Яш, Калтаса район.Авторын фотожо.