Республикысе тӱҥ ёлкыш мийышт

Монар школын 10 классыштыже тунемше Н. Александрова шочмо йылмыжым моткоч йӧрата да шымла. Кодший районысо йыжыҥыште сай лектышым ончыктен да марий йылме дене республикысе олимпиадыште призёр лийын. Тиде олимпиадыштак Тынбай школын тунемшыже А. Ибатова сеҥышыш лектын. Анита 10 классыште тунемеш, ӱстел теннис дене тӱрлӧ таҥасымашлаште кӱкшӧ лектышым ончыкта. Мишкан селасе 2-шо школын 7 классыштыже тунемше А. Шамшитова сӱретлаш йӧрата, литератур конкурслаште призовой вер-влакым наледа. Ёлкыш ойырымо годым ӱдыр-влак «одарённый йоча» тӱшкаш логалыныт. А Нерге школын 5 классыштыже тунемше М. Аликаев шуко икшыван ешыште кушкеш, сандене тиде пайремыш колташ тудымат ойыреныт.

Республикысе тӱҥ ёлкышто лиймаш - йочалан кугу пиал. Тиде кече нунылан ӱмырешлан шарнаш кодеш. «Ме чылт йомак тӱняш логалынна», - куанен каласкалышт ӱдыр-рвезе-влак. Автобусым корно мучко ГИБДД-н автомашинаже арален кайыш. 

«Башкортостан» кугыжаныш концерт залын кажне лукшо У ий шӱлышым арален. Тушто чылан моткоч мотор, поро да весела кумылан ыльыч. Йӱштӧ Кугыза, Лумӱдыр да моло герой-влак хороводым пӧрдыч, кумылым нӧлтальыч. Ме залыште спектакльымат ончышна, Йӱштӧ Кочан академийышкыже унала мийышна. Тушто Мераҥ, Лумкурчак, Теле кувай, Емеля да Патыр тыршен пашам ыштат ыле. Осал герой-влак деч поснат ыш лий. Вувер Кува, Лум оза, Черномор да ученый Пырыс Йӱштӧ Кочам аҥыртараш, лугаш тыршышт. Но шонымашыштым шукташ нунылан шинчымашышт ыш сите… Спектакль годымат йоча-влак мурышт, куштышт, герой-влаклан полшышт - икманаш, юзо йомакыш логальыч. 

Могай У ий пайрем пӧлек деч посна? Тидыжат лийын. Бренд семын сӧрастарыме котомкаш йоча-влаклан шушаш ийын символжым, книгам да тамле конфет-влакым оптеныт. Сылне пайремыш мийымыштлан тунемше-влак тудым ямдылыше-влаклан да Мишкан район образований пӧлкан пашаеҥже-влаклан таум ойлат.