Наукыштат, мер пашаштат чолга

- Надежда Александровна, кандидатлык диссертаций нерген мутым тарватымек, вигак йоднем: шымлыме пашадам тыглай лудшылан кузе кӱчыкын умыландарен пуаш лиеш?

- Диссертацийыштем кушкыл-влакым экологий велым лӱдыкшыдымӧ технологий йӧн, лачшым моткоч тыгыде поҥго-влак полшымо дене, пеҥгыдемдымым радамленам. Тыгай поҥго-влак кушкыл вожышто иланат да нунылан начар условийыштат, мутлан, неле металл погынымо мландыште - а олалаште лач тыге кушкыт - атыланаш йӧным ыштат. Нуно кушкыл-влаклан мланде гыч питательный элементым налаш полшат, да тидлан кӧра химический пестицидым да минеральный удобренийым кучылтмаш шагалемеш.

- Те тиде темым икмыняр ий годсек шымледа, пашадам шуяш грантымат пуэныт… 

- Да, 2021 ийыште диссертацийыштем радамлыме йодышла дене самырык-влакын «iВолга» форумыштышт палдарышым да шымлымаш пашамым умбакыже шуяш 150 тӱжем теҥге грантым ойырышт.  

- Ынде шкежат самырык тукымым туныктеда?

- Мыланем илышыште шке верым муаш шонышо самырык-влак дене пашам ышташ келша. Йырвел тӱняна, пӱртӱсна аружак огытыл, садлан пӱртӱс-аванам аралыман да тидлан моло еҥымат туныктыман. А тиде сомылым ончыкыжым самырык специалист-влак, нунын радамыште мемнан университетыште ямдылыме инженер-эколог-влакат шке кидышкышт налыт да ворандарен колтат манын ӱшанем.

- Мыланем туге чучеш, те шкежат ура чонан улыда да шымлыме-туныктымо паша дене гына огыда серлаге, шочмо калыкнан тӱвыражым вияҥдашат жапым муаш тыршеда?    

- Мый марий ӱдыр улам, садлан калыкемын илыш радамжым, йӱлажым, тукымвожем келгынрак палаш шонымаш эре лийын. Тыге студент годсек республикысе марий самырык тукымым ушышо «Ӱжара» организаций дене пеҥгыде кылым кучем, ӱдыр-рвезе-влак дене пырля тӱрлӧ мероприятийым эртарена.

Кодший кеҥежым Удмуртий гыч коктын Марий Элыш Марий самырык тукымын слетышкыжо мийышна. Шочмо йылме дене эртарыме тӱрлӧ мероприятийыште: конкурслаште, мастер-класслаште, концертлаште - вийым тергышна, мастарлыкнам ончыктышна, у шинчымашым погышна, проектым возаш тунемна. Вес кундемлаште илыше иктаҥаш ӱдыр-рвезе-влак дене палыме лиймым да вашкылым ыштымым моткоч пайдалылан шотлем. 

Тений олаштына «Шочмо вож» у ансамбльым чумырышт, тудым Карина Вахрушева вуйлата. Мыланемат ты ансамбльыште кушташ, республикысе олала ден яллаште тӱрлӧ пайремлаште калыкнан койыш-шоктышыжым ончыкташ келша.