Шым гана висе

- Мый Диман аваже улам. Тендан ӱдырда школ гыч толын? - йодеш уэш.

- Толын, урокым ышташ шинчын, - нимом умылыде вашештышым.

- А тудо школышто Дима ден коклаштышт умылыдымаш лекме нерген ыш ойло? 

- Ойлыш, - манам. - «Мый йоҥылыш кынервуем дене Диман кидшым шӱкальым, да тудо «р» буквам йоҥылыш возыш. А тудо мыйын книгамым удыркалыш. Книгаш удыркалаш кӱштен огытыл, садлан мый туныктышемлан каласышым. А тудо, воштылын, «Тунам тыят удыркале» мане». А мо лийынже? - умылаш тӧчем. 

- Мыйын эргым школ гыч тольо да пӧлемыште шортын шинча. Эрла школыш ом кай, манеш. Мый кӧ титакан улмым умылынем, - каласкалаш тӱҥале ӱдырамаш. 

- Тек шке коклаштышт лончылат. Мый мом ыштен кертам? Мый тушто лийын омыл, -  ойлем. 

Тудо мыйым огешат колышт, эргыжым веле мокташ тӱҥале:

- Дима олимпиадылаште икымше верым, тӱрлӧ конкурслаште почетан верым наледа, изи годсекак ӱдыр-влакым обижаяш ок лий манын туныктена. 

- Мый дечем мом вучеда? - палынем мый. 

А тудо шкенжынымак ойла. 

- Те мый дечем извиненийым вучеда докан, - шуко колыштмеке, шомакшым кӱрльым. - Йӧра, Катя тетла тыге огеш ыште, - пелештышым да телефонем йӧртышым. 

Мутланыме деч вара шуко шонкален шинчышым. Ала-молан школ годсо жапем шинча ончылнем сӱретлалте. Мыйымат тыге иктаж-кӧ шӱкалын колтен дыр, но мый авамлан вуйым шияш куржын омыл. Ойленам гынат, кугу проблемыш савырен огытыл. Ала ялыште илалтын, да чылажат вес семын лийын… А олаште иктаж-мо лийын кая гын, вигак ава дек, туныктышо дек йыҥгыртат, кӱлеш гын, школ вуйлатыше декат шуыт. Мый гын ӱдыремын каласкалымаштыже нимо удамат шым уж. Йоча-влак коклаште моат огеш лий. Кызытак кажне гана тыге йыҥгыртен лончылаш тӱҥалам гын, вараже мо лиеш? 

Йоча - тудо йочак. Коклаштышт сырат гынат, пел шагат гыч садак пырля модаш тӱҥалыт. А тыге йыҥгыртен ойлаш сайжак огыл, шонем. Йоча-влак келшаш тӱҥалыт, а ава-ача коклаште умылыдымаш кодеш. Садлан марий калык арам огыл ойла: «Шым гана висе, ик гана пӱч».