Весела кеҥеж каныш

Кеҥеж - йоча-влаклан весела модышлан, канышлан поян да тазалыкым пеҥгыдемдыме жап. Модмаш годым йоча-влак икте-весе коклаште вашкылым вияҥдат, куаныштым лош пайлат. Тидлан кеҥежымсе тазартыме лагерь-влак моткоч сай йӧным ыштат. 

Нефтекамск оласе 13-шо школышто 1 август гыч «Келшымаш шонанпыл» лагерь пашам ышта. Тушто 150 икшыве жапым пайдалын да веселан эртарат. Спорт мероприятий, экскурсий, квест, оҥай конкурс да модмо программа - ӱдыр-рвезе-влаклан йокрокланаш жап уке. Лагерьын кажне кечыже оҥайын да пайдалын эртыже манын, тиде сомылыш туныктышо-влак уло вийыштым да моштымашыштым пыштат. Кугурак вожатыйын сомылжым шукташ тӱҥалтыш класслаште туныктышо У.А. Ипаевалан ӱшаненыт. Лагерь вуйлатышылан Р.И. Гарипова тырша. Ульяна Алексеевнан мутшо почеш, кажне эр весела зарядка гыч тӱҥалеш. Йоча-влакым кандарыме дене пырля, лагерьын тӱҥ сомылжо - тунемше-влакым икте-весым пагалыме шӱлышеш кушташ, калык-влакын тӱвыра поянлыкыштым аклаш, шочмо пӱртӱсым, йырысе вер-шӧрым аралаш кумылаҥдаш. Тиде шонымашке шуаш «Пелед, мыйын Россием!» кугыжаныш флагын кечыже вашеш квест, «Тӱнясе калык-влакын куштымашышт» фестиваль, «Сандалыкым аралыза!» модмаш, «Башкортостанын наследийжым перегена» концерт, «Элем дене кугешнем» сӱрет конкурс, С. Юлаевлан пӧлеклыме «Данле патырын тукымжо» конкурс да икте-весым умылымаш, икте-весылан полшымаш, икоян улмаш, келшымаш да моло сай койыш-шоктышым вияҥдаш полшышо тӱрлӧ мероприятий-влак эртаралтыт. Йоча-влак лагерыште тыгак оласе краеведений музейыш, бассейныш, «Мирас» сӱрет галерейыш миен толыт.