Слетышто яра пагыт лийын огыл, кажне шагатлан могай-гынат мероприятийым палемденыт. Кажне кечын арт-унагудым, экскурсийым але мастер-класс-влакым эртареныт. Марий самырык тукым слет кажныланна пайдале лие манын шонем. Тудо шочмо йылмынан историйжым келгынрак пален налаш, тудым арален кодаш полша, тушто кидпашалан, проектым возаш да молылан тунем толаш, шукырак марий йӱлам пален налаш лиеш.
Пошкырт кундем гыч кандашын - Валентина Кугубаева, Милена Байгулова, Елена Хамитова, Снежана Апкадирова, Нина Изимариева, Мария Кугубаева, Александр Баязов да мый, Людмила Чиноева, - мийышна. Ме Вика ден Иринан вуйлатыме 3-шо да 4-ше лужалаште (отрядыште) лийна.
Мый икымше гана миенам. Мыланем слет келшыш: тушто ӱдыр-рвезе-шамыч весела улыт, ик ешла келшен илат, икте-весым огыт ойыркале, садлан шкемым мӧҥгысӧ гаяк шижым. Сардаял калыкшат поро, нуным шукертсек палымыла чучо. Тиде слетышто илышышкем у шӱлышым ешараш полшышо шуко ӱдыр-рвезе дене палыме лийым. Организатор-влаклан тыгай чапле слетым эртарен колтымыштлан кугу тау.