Куаныше кумылан чеверласышт

Тиде кок арня жапыште йоча-влак пайдале шинчымашым нальыч, уым, оҥайым ужыч-кольыч да тӱрлӧ верлашке экскурсий дене миен савырнышт, батут паркыште уло кумылын модын-юарлышт. Кама эҥер серыште лийыч, тушто оҥай еҥ - байкер-влак - дене вашлийыч да шкештат мардеж ваштареш мотоцикл дене кудалыштыч. Кажныжым мыняр куан, могай шӱм вургыжмаш авалтышт тунам! Светлое ер воктекат миен тольыч. Олан моторлыкшым, пӱртӱс поянлыкшым эскерышт. 

Рӱдерын кажне пашаеҥже ӱдыр-рвезе-влакын шинчымаш тӱняштым у тошкалтыш семын пойдараш полшыш. Медицина пашаеҥ-влак тазалыкыштым саемдаш тӱрлӧ процедурым ыштыльыч. А йоча-влаклан тидым уш-акылыште, кап-кылыште, шӱм-чонышто пеҥгыдемден веле кодыман. 

Пытартыш кечын икшыве да нунын ава-ачашт деч ятыр поро шомакым колна, куан шӱлышым шижна. Чыланат  икте-весылан тауштен, угыч вашлиймешке чеверласышт.