Нефтекамск оласе тазалыкым пеҥгыдымдыме рӱдерыштат йоча-влакын илышышт вӱд толкын гай шолеш. Тыште йоча-влак кажне эрдене зарядкым ыштат, режим почеш кӱлешан процедурым налыт да чын илаш тунемыт. Туныктышо коллектив нунылан яра жапыштым пайдалын эртараш полша. Йоча-влак тӱрлӧ конкурсышто вийыштым тергат, пӱртӱсым шымлаш да аралаш кумылаҥыт. Нунын деке тыгак волонтер-влак толын коштыт да весела шӱлышым пуртен каят. Йоча-влак шукыж годым экскурсий дене олаш лектын пурат. Тушто шуко у, оҥай шинчымашым налыт. Тиде жапыште кажне йочам мыняр куан шӱлыш авалта! А кайымышт деч ончыч чылан артистыш савырнат, шке мастарлыкыштым ончыктат. Мурен-куштен, пьесым шынден, рӱж совым кырен чеверласат. Кеҥеж семынак, молылан шке шокшо, ныжыл кумылыштым пӧлеклен кодат.