Все новости
Самырык тукым
27 Июнь 2022, 14:39

27 июнь - Самырык-влакын кечышт: Пайрем веселан эртыш

Кеҥежым ий еда Россий мучко Самырык-влакын кечыштым пайремлат. Нунын дене мемнан - элнан, тӱнян, сандалыкын - ончыкылыкышт чак кылдалтын. Тыгай пайрем Совет Ушем годымак шочын: самырык тукымын кечыжым икымше гана 1958 ийыште палемденыт.

Авторын фотожо-влак.
Фото:Авторын фотожо-влак.

СССР Верховный Президиумын пунчалже почеш, тудым Совет ӱдыр-рвезе-влакын кечышт семын пайремлаш темлалтын. Тунемме ий пытен, экзамен-влак эртеныт - каналташат лиеш. Но пайрем каналтыме шонымаш дене гына огыл эртаралтын. Тиде кечын Совет Ушем мучко тӱрлӧ собраний, слет, завод, фабрикылаште таҥасымаш, спорт конкурс да фестиваль-влакым эртареныт. А кастене пырля погынен пайремлымаш, куштымаш-влак вученыт. Лӱмын пайремлыме кечыже лийын огыл - июнь тылзын пытартыш рушарняжым ойыреныт. Совет Ушем шаланымеке, пайрем нигуш йомын огыл - тудым 1993 ийыште Российын икымше президентше Борис Ельцин 27 июньышто пайремлаш тӱҥалме нерген пунчалым луктын. 

Тений 27 июнь паша кечылан логалын, сандене мероприятий-влак ончылгоч тӱҥалыныт. Самырык-влакын кечышт годым кызыт чыла вере пайрем концерт, спорт таҥасымаш, конкурс-влакым эртарат. Мишкан селаштат пайрем пеш веселан эртыш. Умыр кеҥеж  кастене 24 июньышто районысо тӱвыра полат ончылно шуко ӱдыр-рвезе погыныш. Торжественный ужашыште мер илышыште шкем чолган ончыктышо ӱдыр-рвезе  да нунын вуйлатышышт-влаклан  Российын Чап грамотыжым, Тауштымо серыш-влакым кучыктышт. Концерт программыште шкенан районын талантан еҥже-влак мурыштым йоҥгалтарышт. Вара тӱрлӧ тӱсан чия дене икте-весым чиялтен модмаш, таҥасымаш-влак тӱҥальыч… Чылан шонанпыл гай лиймеке, дискотекыште икте-весе дене куан кумылыштым пайленыт.

Авторын фотожо-влак.
Авторын фотожо-влак.
Авторын фотожо-влак.
Авторын фотожо-влак.
Авторын фотожо-влак.
Авторын фотожо-влак.
Фото:Авторын фотожо-влак.
Автор:И. ЗАХАРОВА. Мишкан район.
Читайте нас: