Все новости
Самырык тукым
2 Июнь 2022, 10:52

Кеҥеж каныш шуын

Игече южгунам мемнам пулаштарен кертеш гынат, календарь эре чын сӱретым ончыкта: 1-ше июнь шуын гын - кеҥеж толын. Такшым тений тиде кече чын кеҥежымсе гаяк тӱҥале: эрденак ояр да шокшо лийын шинче. Икшыве-влаклан, пырля чумырген, ял покшелсе клуб воктене весела пайрем программыште воштыл юарлаш лач веле лие. Вет 1-ше июнь - нунын пайремышт, Йочам аралыме тӱнямбал кече.

Авторын колтымо фото-влак.
Фото:Авторын колтымо фото-влак.

Изирак йоча-влак авашт-кувавашт дене пырля миеныт, кугуракышт шкеак куржын толыныт але велосипед дене миен шуыныт. Клуб пашаеҥ-влак нуным куанен вашлийыч да оҥай модыш программым эртарышт: йоча-влак куштышт-мурышт, тушто-влакым палаш тыршышт, весела таҥасыме конкурслаште вийыштым тергышт. Икманаш, пайрем шотлан тольо!

Йоча-влаклан кеҥеж каникул шуын, ынде туныктышо ден воспитатель-влак воктенышт огыт лий. Ӱдыр-рвезе-влак 92 кеҥеж эрым, 92 кеҥеж кечым да тынарак  касым ача-авашт пелен илат, садлан кугыеҥ-влаклан тӱткылыкым ешараш логалеш. Чылажат пайдалын, оҥайын эртыже манын, пеш сайын шоналтыман. Йоча кече мучко телевизор воктен, компьютер да телефон дене шинчылташ тӱҥалеш але вестӱрлӧ программа лиеш, шыже толын шумеке, школышто «Кузе мый кеҥежым эртарышым» сочиненийыштыже мом возаш тӱҥалеш - чылажат ача-ава деч шога.

Авторын колтымо фото-влак.
Авторын колтымо фото-влак.
Авторын колтымо фото-влак.
Фото:Авторын колтымо фото-влак.
Автор:И. ЗАХАРОВА. Монар ял, Мишкан район.
Читайте нас: