Тарватыме сомылыштым волонтер да клубын пашаеҥже-влак тений 11 январь годсек илышыш шыҥдарат: зданий-влак пеленсе саварым граффити йӧн дене оҥай арт-объектыш савырат. Тӱзатен сӧрастараш Нефтекамск оласе психоневрологий, наркологий диспансер-влак, тыгак «Торпедо» стадион йырысе кумдыкым ойырен налме. Тидлан ме ончылгоч «Олам сӧрастаре» конкурсым увертаренна ыле. Тушто «#роднойНефтекамск», «Эко-плакат», «Самырык-влак да спорт», «Врач-влаклан тауштена!» номинацийлаште эн сай эскиз-влакым ойырен нална. Тыгеракын ола уремысе пырдыжлаште кечан вӱд сер, Волгыдо ер, врач-влакым чапландарыше сӱрет-влак шочыныт. Савар-влакым «Октава» клуб ушемын волонтержо, стрит-арт художник, студент-влак сӧрастарат.