Патыр рвезе-влакым ойыреныт

27 апрельыште Йошкар-Олаште Марий тӱвыра рӱдер «Марий патыр» конкурсым эртарен. Тушко кандаш рвезе ушнен. Сеҥыше-влак кокла гыч икымше верым налшыже - мемнан землякна, Дӧртыльӧ район Турбек ялын шочшыжо ВАЛЕНТИН ГАЙНИЕВ.

В. Гайниев школ деч вара Нефтекамск оласе шуко профилян колледжыште чоҥышылан тунем лектын. Кум ий ончыч Озаҥ олаш илаш куснен. Кызыт тушто логистлан пашам ышта.

Ача-аван тыршыме дене изинек чонышкыжо марий шӱлышым шыҥдарен, «Изэҥер» ансамбльыште кушташ тунемын кушшо рвезе, шке ойлымыж гыч, ӧрдыж кундемыште шочмо йылмынам, йӱланам эше чотрак аклаш тӱҥалын. Тыгай шижмаш денак Озаҥыште Л. Мусихинан вуйлатыме национально-культурный автономийын мер пашашкыже уло кумылын ушнен да кызыт автономий правленийын еҥже улеш.

Конкурсышто рвезе-влаклан шке шинчымашыштым да моштымашыштым тӱрлӧ велым почын пуаш кӱлын. Валентин салтакыш ужатыме йӱлам ончыктен. Ожсо йӱла нерген утларакше аваже Роза Юликовна да 82 ияш коваже Гульсипа Абдулвалиевна деч пален налын. А модын ончыкташыже йолташыже-влак (Нунын коклаште Мишкан районын шочшыжо Карина Шамиевам да Балтач район рвезе Ростислав Ахмадишиным палемдыман.) полшеныт. Тылеч посна конкурсышто рвезе-влакын вий-куатыштым, этнографийым кузе палымыштым рашемденыт да чумыр иктешлымашым ыштеныт.

«Мый икымше верым налмемым шочмо калыкем верч вуйын шогаш кӱлмӧ семын аклем. Шке илыш девиземлан «Марий калыкын ончыкылыкшо - мемнан кидыште» ойсавыртышым ойырен налынам. Ме огыл гын, кӧ йылмынам да йӱлана-влакым шушаш тукымлан, икшывына-влаклан арален кода манын шонем. Тиде сеҥымашем кум ий ончыч илыш гыч кайыше ачамлан лӱмдем…» - иктешлыш ойжым 21 ияш Валентин Гайниев.

В. Гайниевын да Т. Пчелкинан колтымо фото-влак.

Читайте нас в

«Чолман». Республиканская общественно-политическая газета на марийском языке. Издается с 24 апреля 1991 г.

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».