Илышыжат кино гай

Мыланна эн лӱдыкшӧ Вувер Кува ден Кащей, эн патыр Чапаев ден Матросов, эн мотор да поро Василиса ден Дюймовочка лийыныт. А кызытсе йоча-влак нунын нерген кино ден йомак-влакым огыт пале да палымыштат ок шу. Ожсо пагытысе гай ял клубышто тыгай кином от уж.

Мый нунылан икана йоча жапыште Чапаев нерген кином ончаш каяш погынымына нерген каласкалышым. Уремыште шыже ыле. Тале йӱштӧ йӱр йӱрын. Тунар пычкемыш - воктен ошкылшо йолташ ӱдыремат койын огыл. Йоҥылыш лавыраш тошкал колтен, тушан пижат гын, кемат кудашалт кодын кертын. Тыге нӧрен, лавырген, пошкудо ялыш миен шуна. Уло кумылын кином ончен, мӧҥгӧ шӱлыкан пӧртылна. Чапаевна вӱдым ийын ыш лек. Эрлашыжлан эше каяш кутырен келшышна, товатат ийын лектын манын шонышна. Ийын лекмыжым вучен, кум кече куржтална. Но уке…

Индий кином ончыктымышт годым клубышто шинчаш огыл, шогалаш вер лийын огыл. Самырыкше, шоҥгыжо - чылан тушко миеныт. Кино деч вара мӧҥгӧ вашкен огытыл - кином лончыленыт.

Кызытсе йоча-влакым уремыш от лук: чылан телефонышто да Интернетыште «кечат». Нунылан мемнан годсо кином да йомакым ончаш кумылло огыл. Туге гынат ик кастене эргым дене пырля ик йомакым ончаш вереште. Лачак Дюймовочка нерген. Ончен пытарымек, йомакым лончылаш шична. «Ну, - манам, - келшыш йомакет?» Воштыл колтыш да ойла: «Логалыт вет тыгай мотор изи ӱдырлан каче-влак: иктыже малаш да кочкаш веле ойгыра, весыже пеш каткан, шыдаҥжым чамана. А принц йӧршын симулянт - ушым йомдарен шуҥгалте! Тиде йомак тендан илышлан ок келше, а мемнан илышым койдара веле».

Могай йомак дене сылнештараш кызытсе йоча-влакын илышыштым? Тидын нерген шоналташ веле кодеш.